Trent’anni di passione
U paese di Bucugnà hà festighjatu, a dumenicata scorsa, i trent’anni di a fiera di a castagna. Una festa maiò celebrata cumu si deve trà aspetti culturali è economichi. Una manera, dinù, di mustrà chè a scumissa fatta in u 1982, ùn era una tuntia ma un prughjettu à long’andà sbuccatu, oghje, nantu à u sviluppu di a maiò parte di i prudutti identitarii corsi. È masimu a castagna…
Quantu erani, sta dumenicata, à francà a bocca di Vizzavona (per i Cismuntinchi) è ghjunghje d’Aiacciu o d’altri lochi di u pumonte per esse prisente à a 30ma fiera di a castagna, in Bucugnà ? Deci milla, dodeci o di più, ùn si sà in fattu. Ciò ch’è sicuru hè ch’elli eranu assai numarosi per stu mumentu particulare. Trent’anni di passione, di travagliu dinù, intornu à a castagna, primu pruduttu corsu à esse messu in vale per ghjunghje à e filiere chè no’cunniscimu oghje. Quant’eranu, in ottanta dui, à crede à u sviluppu di sta fiera è ciò chì hè sbuccatu dopu ? Pochi, à dilla franca. Eramu, à mezu à u riacquistu è ghjeranu i primi passi di stu genaru di fiere. Oghje, sò corsi l’anni. Trenta. Daretu à sta fiera à tema, hè nata una federazione è tredeci altre fiere intornu à un pruduttu identitariu (u ficu, a clementina, u casgiu, u vinu, a robba purcina, u mele, ecc). Ancu s’è l’affare ùn hè compia, l’agricultura isulana s’hè sviluppata. I prudutti corsi sò, avà, rinumati, anu avutu, per certi, l’AOC è oghje l’AOP, hè segnu chè sta messa in vale, face a so strada (ancu s’è ne ferma à fà). Senza sminticà certi scambii cù d’altri paesi (Italia, Sardegna, Spagna, Paese Bascu è ancu Finlanda). Scambii economichi ma dinù culturali. Oghje, ci vole à ricunnosce chè sta scumissa di u 1982 hè stata una riesciuta. Tandu, eranu più numarosi chè mai, a dumenicata scorsa, per festighjà sta trentesima edizione. Sottu à u tindonu, centu cinquanta artisgiani cù robba diversa (robba purcina, vinu, mele, casgiu, ghjoculi per zitellucci, cunfittura, ecc), i media corsi (RCFM, Corse-Matin), a camera d’agricultura di u Pumonte, a squadra di Cucina Corsa, u sindicatu AOP, ecc… S’hè trattatu di u sviluppu di a filiera castagnina, a malatia di l’arburi, l’avvene di i ghjovani chì cercanu à stallassi…Un concorsu di farina hà compiu sti trè ghjorni. Trè ghjorni d’una festa populare cù canti è musiche (Quilapayun, a scola di cantu…mancaria qualcosa di più sputicu à l’usu anticu) per una fiera chì ghjè u spechju di i pruduttu di l’agricultura corsa…
F.P.