A Santa di u Niolu

« A Santa » hè u testimoniu d’un modu di campà chì, à pocu à pocu, si n’hè sparitu in Corsica. Nata, cinque seculi fà, ciò chì era, à, principiu una festa religiosa, s’hè sviluppata, accantu, per divintà, à partesi di a fine di u 19mu seculu, un locu maiò di scambii economichi. Si ghjunghjia, tandu, da tutti i lochi di Corsica per cumprà, vende, scambi ma dinò cantà (paghjelle) o impruvisà. Minellu d’Ascu, Pampasgiolu, u Furcatu è tanti altri anu passatu nuttate sane in campu di fiera. Ghjera l’uccasione di mustrà a so robba, l’animali è di fà u « pienu » per l’annata, masimu nanzu di entre in invernu. Oghje, s’ella ci hè sempre a fede intornu à un aspettu religiosu chì, ci vole à dilla, adunisce a maiò parte di a ghjente, a fiera hà persu a so sputichezza. Sò passati i tempi di u riacquistu induva era un bisognu di cullà à a Santa, l’aspetti ecunomichi di prima anu lasciatu à so piazza à un altru modu di vita, di campà. Masimu cù tutte e fiere tematiche ch’è no t’avemu in Corsica.Ùn ci vole micca avè a nostalgia di s’epiche gloriose ma ricunnosce, ancu s’è a santa di Niolu stà un mumentu maiò per a populazione, chè a Corsica hà francatu qualchì passu perdendu u pocu di u so estru anticu…