Adunitu incù d’altri rughjoni o paesi, u culletivu "Parlemu Corsu" participeghja, sabbatu chì vene, à un’azzione cumuna. Si trattava, à principiu, di 63 parsone in Aiacciu per fà una catena davantu à a prifettura. Ma u numaru hè, dapoi, assai crisciutu. Tandu, a catena umana privista si puderà allargà. È parchì micca sin’à l’assemblea di Corsica ?
Avemu dighjà scrittu nantu à a a dermachja di u Culletivu "Parlemu Corsu". Adunitu ind’una mossa maiò incù d’altri rughjoni o paesi in Francia o in Ispagna, un’azzione rivindicativa cumuna in u sensu di u sviluppu di e lingue minoritarie hè privista l’ultimu sabbatu di stu mese. In Aiacciu, ci serà una catena umana davantu à a prifettura. À principiu, s’aspittavanu 63 parsone. Ma u numaru hè, dapoi, assai crisciutu. Si trattaria di più di centu parsone. "Prima, spiega Michele Leccia, respunsevule di u Culletivu "Parlemu Corsu", aviamu privistu una piccula catena umana ; uni pochi di bandere è d’affissi chì ripigliavanu e rivindicazione di u Culletivu è quelle di e lingue minoritarie. U tuttu davantu à a prifettura nanzu una cunferenza. Oghje, incù a mubilizaione chì ci hè stata intornu à st’azzione, avemu francatu i centu parsone. Tandu, emu da sviluppà a nostr’azzione circhendu di sparghjela u più luntanu pussivule." St’azzione simbolica puderà, forse, sbuccà davantu à l’assemblea di Corsica. Per u Culletivu, u scopu hè di mubilizà dinò d’altre parsone, associi, studienti, liceani è di dà a sta demarchja, un intaressu maiò. "Vulemu mustrà chì a populazione di Corsica t’hà a primura di a so lingua è ch’ell’hè pronta à mobilizassi per a so difesa. Ma, ùn ci serà alcuna recuperazione pulitica. Vulemu solu ripiglià e rivindicazione di u Culletivu, è dinò stu messaghju chè no purtemu cù tutte l’altre lingue minoritarie. Hè per quessu chè no chjamemu à tutti quelli chì volenu impegnassi in sta demarchja." Una demarchja chì, fatta in sti tempi d’elezzione presidenziale, permette d’avè un sguardu impurtante -è necessariu- à un nivellu mediaticu, ma dinò di chjamà l’eletti è di metteli davantu à e so respunsabilità. À long’andà, u Culletivu conta mett’in piazza un raportu cù u Statu per, pocu à pocu, sbuccà nant’à una sucietà bislingua. Ci hè sempre a strada à fà ma, un passu dopu à l’altru...
F.P.