« Una canzunetta », ghjè l’emissione chì tuttu u mondu po vede, ogni marcuri nantu à a via stella. Zitelli ghjunti da scole bislingue sò aduniti da…Francine massiani. Una vuluntà di più, di a cantadore balanina è di stu media, di sviluppà a lingua corsa.
Francine Massiani hà fattu a so strada dapoi qualch’anni in u mezu culturale. S’impegna in u cantu corsu ma dinò per a salvezza di a lingua. Tandu, l’idea, cù Jean-Jacques Torre, respunsevule di a sucietà « Intervista Prod », hè sbuccatu nantu à un prughjettu à tempu, linguisticu, culturale à pedagogicu. « Hè un ‘idea ch’è no’ t’aviamu dapoi qualchì tempi, spiega a Balanina, in cumunu, avemu riflettutu à nantu è l’affare s’hè fatta. Un prughjettu, di sicuru, intornu à a lingua. » « Una canzunetta » era nata. Ùn mancava più chè di cuncipiesce di manera precisa, l’emissione. Francine si ne và, di tandu in tandu, in è scole bislingue di u circondu d’Aghjacciu per travaglià incù sculari di u ciculu dui (CP). « Ci vocu trè volte in quindeci ghjorni, travagliemu cù i zitelli è i maestri intornu à una canzona, ch’ella sia tradiziunale o muderna, una canzona zitellina. » Si travaglierà, cum’è d’altronde, i maestri, u lessicu di a canzona, a tematica ma dinò a meludiao u ritimu (pulsazione) sempre cù ghjochi. Dopu, cù l’aiutu di Filippu Pimenov è a so ghittara, quattu emissione di 13 minute sò registrate in France 3 Via Stella. « Pigliemu, ogni volta, duie classe di sei zitelli, ci sò fiure fatte in leia cù a canzone è a tematica scelte è si ripiglia ciò ch’avemu vistu inseme à a scola. » Cusì, Francine Massiani ripiglia u cuntattu cù l’insignamentu di a lingua corsa, induva avia principiatu nanzu di piglià a strada chè no cunniscimu oghje. « Tuttu hè liatu. Stu prughettu, u teniu caru, scrivemu cù Jean-Jacques Torre, l’emissione è ghjè veramente piacevule d’avè stu cuntattu cù sculari. Per avà, st’emu in u circondu d’Aghjacciu, hè più faciule di registrà l’emissione. Ma, à più o menu long’andà, circaremu di spiazzà a struttura, l’inseme, sia in Bastia, sia in Corti (spaziu culturale Natale Luciani) per pudè travaglià cù scole di u Cismonte. » « Una canzunetta » hè diffusata ogni marcuri à meziornu menu quartu eppo quattru altre volte sin’à dumenica. È si sà, d’altronde, ch’ùn ci hè micca megliu chè u cant per l’amparera di a lingua…
F.P.