Dapoi u 2008, U Cullettivu "PARLEMU CORSU !", face parte d’una "piattaforma rivindicativa", chì adunisce e lingue "minuritarie" di u territoriu francese. Avemu dighjà parlatu, a settimana scorsa, di sta piattaforma. Cusì, un’azzione generale int tutte e rughjone impegnate in sta demarchja, hè privista à a fine di u mese in Aiacciu. Scopu : sensibizà a populazione ma dinò lampà una chjama, nanzu à l’elezzione presidenziale, à tutti i candidati...
S’approntanu, uni pochi d’azzione stu sabbatu u 31 di marzu, nanzu à l’elezzione presidenziale. U Cullettivu "Parlemu Corsu", per contu soiu, participarà à sta mubilisazione generale. St’azzione sò state dicise dapoi un annu, in cumunu cù tutti i riprisentanti di l’altre lingue. Cusì, In ogni rughjone, ci sarà, à tempu, una mubilisazione : à chì farà un cuncertu, à chì una manifestazione, à chì una canzona cantata da un carrughju sanu..."In Corsica vulemu fà una "catena umana", spiega Michele Leccia, respunsevule di u culletivu "Parlemu corsu", avemu da ripiglià e 16 rivindicazione di u Cullettivu, dunque 16 linzoli, e nostre banniere (Parlemu Corsu ! è Sucità Bislingua), 2 slogan mubilizatori, un scrittu spiegativu in Francesu (à l’iniziu, era privistu per Pariggi..). In finale, ci vuleria à esse 64 par fà a catena davant’ à a prifettura. Ci serà un linzolu una affiscia "Parlemu Corsu !" un linzolu, una affiscia "lingue minuritarie" è dinò un linzolu per compie ... S’è no simu di più, tantu megliu !" Per avà, s’tazzione cunnosce un successu maiò postu chè 93 parsone anu dicisu d’impegnassi in questa demarchja. "Avanzemu pianu pianu senza pratinzione è circhemu di fà un’azzione cù un spiritu festivu, culurita è visuale, è purtata da u Culletivu. Un azzione chì serà luntana da e strutture pulitiche partighjane ma un’azzione militanta." Cusì, u culletivu ma dinò tutte l’associe adunite volenu mette a pressione à i canditati nanzu à e presidenziale (à quale una lettera hè stata mandatu è n’avemu dinò parlatu a settimana scorsa) ,"ma dinò à i nostri eletti chì pudarìanu fà ancu di più è sopra à tuttu stabilisce un raportu di forza cù u statu per utten di più", ripiglia u respunsevule di "Parlemu corsu".
Incù st’azzione simbolica è rivindicativa, u culletivu vole sensibizà di più e cuscenze, arradicà a so demarchja per, in fine, appruntà a populazione -si tratta quì dinò di u populu- à un raportu di forza ch’ellu conta bè stabilisce è...vince un ghjornu prussimu.
F.P.