UMAGIU
S’hè spenta, l’ottu d’aostu scorsu, Maddalena Pelloux, nata Albertini, à l’età d’ottant’ottu anni. S’ell’era pocu cunnisciuta da i più giovani, l’anziani di u quartieru di a piazza Abbatucci sin’à a Piazzetta, o a stretta di a Barriera, si ramentanu d’una parsona sempre u surrisu in bocca, pronta à dà una manu, chì facia e so spese ind’è tutti i cummercianti di u locu. In fondu di u so tabaccu, vicinu à a pastizzeria « La Princière », avia sempre una parolla, un ghjestu per quelli ch’intrianu. Ghjera, dinù, un’altra manera di cuncepisce u cummerciu, ind’un quartieru induve tuttu u mondu si cunniscia. È Maddalena pudia esse cunnisciuta. Ch’ell’era quì, à vende ghjurnali, sigarette o materiale sculare dapoi…1947 ! Avia ripigliatu, cù u so maritu, ghjuntu da Marseglia, dopu à a guerra, a buttega di a famiglia Seigouffin, (famiglia di u so maritu) ed era à spessu, cugnumata cusì. Nata in Murzu, campava, in tempu di guerra, à u 51 corsu Napuliò in Aiacciu, cù a so famiglia (u so babbu, fattore era, ellu dinù abbastanza cunnisciutu). Tandu, i so « paisani », si cansavanu sempre ind’è ella quand’elli falavanu in Aiacciu. A l’epica, a buttega Seigouffin era guasgi una di e prime di u quartieru cù quelle di « Julot » Paoli, Fornacciari, a famiglia Nacer è i Benetti, chì t’avianu un caffè vicinu. C’eranu dinù e famiglie Marcucci (La Princière), Nivaggioni (La Parisienne) eppo dopu, u scarparu Gavarini, u speziale è tanti altri. Cù Maddalena, ghjè, di sicuru, una bella pagina di a storia di stu bellu quartieru sputicu, chì si chjode.