A 16ma edizione di « Mele in Festa » in Murzu, dumenica scorsa hà permessu di misurà i prugressi di l’urganisatori dapoi u principiu. Fora di aspetti cum’è l’ecunumia, sta ghjurnata era l’occasione d’avè un sguardu nantu à stu bellu paese di i dui sorri…
Dumenica u 30di settembre scorsu, Murzu s’hè messu à l’ora di u mele incù a 16ma edizione di a so fiera. Tandu, chjuchi è maiò, tutti anu participatu, in paese à sta festa piazzata intornu à u mele. Ci vole, oghje, à ricunnosce chè, a scumissa fatta 16 anni fà da i respunsevuli di l’associu « Saint-Laurent » (Santu di u paese festighjatu u 10 d’aostu) era una riesciuta.
« À l’epica, spiega Josée Cipriani, presidente di l’associu, vuliamu ghjustu fà cunnosce u nostru paese. A fiera s’hè sviluppata per diventà, à pocu à pocu, un locu ricercatu da a ghjente. Avemu guasgi 9.000 parsone ogni volta. »
A ghurnata di dumenica era l’occasione, per l’artisgiani, di mustrà i so prudutti, ma, u sabbatu era, per contu soiu, cunsacratu à una tematica più tecnica. Una tematica, d’altronde, impurtante per u sviluppu di stu mistieru. Annu, era ghjunti apicultori taliani per parlà di a malatia di i so castagni. Quest’annu, i respunsevuli anu invitatu apicultori di Cipri, ghjunti per prisintà a so manera di travaglià.
A dumenica, a messa cantata a matina da i ghjovanni murzesi, u cuncertu, dopu meziornu di u gruppu « Strada » è, tutta a ghjurnata, ghjochi, animazione diversi (spassighjate à spinu à sumere), anu fattu di sta ghurnatu un mumentu maiò intornu à a cultura. Senza sminticà, di sicuru, u mele. Scunprendu tutta a so diversità, u publicu averà pussutu capisce, cù u mistieru d’apicultore, a so funzione ind’è a priservazione di a natura. Ed era quessu dinò, unu di i scopi ricercati da u sindicatu di l’apicultori.
« L’anni passanu, spiega Dorothée Velutini, merre di u paese, a tematica ùn scambia micca ma circhemu, ogni volta, di purtà qulacosa di novu. »
A merria, l’associu « Saint-Laurent » è tutti l’abitanti di u paese, anu travagliatu inseme senza cuntà l’ori, un annu sanu, per fà di sta fiera, un mumentu maiò.
F.P.
