Un librettu per chjuchi è…maiò !
Un annu dopu a nascita di u « zazu », libracciolu d’incrucittimi (è tanti altri affari), Jérémy Maudoux, esce, avale, un sicondu librettu ch’ellu hà chjamatu « quaternu di vacanze ». Un mumentu di piacè per tutti, chjuchi è maiò…
U zazu, cunniscite ? Ben sicuru, stu librettu d’incrucittimi, imbulechji è tanti altri affari, si porta benissimu un annu dopu a so creazione da Jérémy Maudoux. Sempre cù 56 pagine ma, si pare ch’è u ciarbellu di stu ghjovanu –ch’ùn manca micca d’idee- sia sempre in muvimentu. Oghje, u « zitellu » di Jérémy hè crisciutu. D’altre rubriche sò nate : I scacchi corsi (in leia cù a lega corsa), u Soduchù « à l’usu corsu », u forucorsu (foru di a lingua corsa) a griglia di l’invitati… Un annu hè passatu è ci pudemu felicità di vede chè u zazu hè sempre quì. Torna un spaziu, certu, specificu, per a lingua corsa. Ma quellu chì, di ghjennaghju u 2011, avia vintu u cuncorsu di a fundazione di Corsica, ùn hà vulsutu arrestassi quì. « Aghju rifletutu à un altr’idea, spiega Jérémy, tene u filu di u zazu, ma fà, à tempu, qualcosa per i maiò è sopratuttu, per l’estate. Cusì hè natu « U quaternu di vacanze « u zazu ». Sempre li stessa filusufia cù tematiche sfarente. » Tandu, stu nuvellu librettu, in vendita, prupone ghjochi nantu à e matematiche, a storia, a geugraffia, e scenze, u Corsu, di sicuru, o ancu a recreazione. U so autore, quantu à ellu, rifleta dighjà à d’altri prughjetti. « À partesi di a prussima rientrata, ci serà, in Corti, un atellu « u Zazu » à u centru culturale universitariu. U travagliu di i studienti serà publicatu numaroni di a nostra rivista (100 à 150 grigli di ghjochi. » A rivista divinterà, à pocu à pocu, semestriale (à partesi di u 2013). Jérémy è a so squadra (sempre li stessa dapoi u principiu, cù Anthony Secondi è Cristofanu Ettori) ci anu da prupone ghjochi diversi nantu à parechji nivelli è sempre cù ogni parlatu di l’isula. Aspittendu à què, i maiò (aiutati da i so figlioli) ponu scopre, iss’estatina, « u quaternu di vacanze u Zazu » per apprunfindisce a so cunniscenza di a lingua corsa…
F.P.
