Più di centu trenta zitelli di e scole di i Canni, Alata è Grussetu saranu, stu luni, nantu à a scena di u spaziu Diamante per un spettaculu intornu à u Medievu corsu. Un spettaculu fattu ind’u quadru d’un APA (Atellu di Pratica Artistica) incù i membri di l’associu « Petra Uchjata », in leia cù a Culletività Territuriale di Corsica, e merrie cuncernate, l’Ispizzione d’Academia di u Pumonte è l’insignanti.
Trà centu vinti è centu quaranta zitelli sò aspettati stu luni à u Spaziu Diamante in Aghjacciu per un spettaculu intornu à u Medievu. A maiò parte di sti sculari di u ciculu trè di i Canni, Alata Prunu è Grussetu (cù dinò i ce1), cunnoscenu dighjà stu locu postu ch’elli ci anu prisintatu dui spettaculi in u 2010 è in u 2011. Spettaculi intornu à « L’arburi di u Tarraniu » è « I strumenti di u Tarraniu » cù, ogni volta, creazione artistiche fatte da l’associu « Petra Uchjata » incù i sculari. Quest’annu, i membri di l’associu anu decisu, cù l’insignanti, di fà un prughjettu intornu à u Medievu corsu. Cusì, i sculari di i CM1 è CM2 (scola bislingua) di i Canni, d’Alata-Prunu è di Grussetu (classa unica cù ciculu trè è Ce1) anu principiatu à travaglià à partesi d’uttobre scorsu (trà un’ora è un’ore è mezu a settimana).
Vers’un allarghera di i prughjettu
Prima, anu fattu a scuperta di i fatti maiò di u Medievu in u mondu è in Corsica. Dopu, ogni classa s’hè impegnata nantu à un tema o un parsunaghju precisu di st’epica : Vincintellu d’Istria (Ce2 d’Alata cù Francesca Fabiani), u Conti Pazzu (CM1 i Canni cù Veronique Pietri), Arrigo bel Messer (CM1 Alata cù Géraldine Basquin), I Paisani (CM2 Alata cù Marlene Musso), Orsalamanu (CM2 I Canni cù Corinne Lombardo), A Muresca (Grussetu cù Joëlle Franscheschini). À pocu à pocu, u prughjettu s’hè sviluppatu sbucchendu, per ogni classa, nantu à una scena d’una decina di minute cù cuntrasti, balli è una creazione musicale. Senza sminticà i custumi. « Avemu circatu di fà cresce sti prughjetti à pocu à pocu, spiega Tiadoru Courteaud, presidente di l’associu, da u primu dischettu « mar’è muntagne », fattu cù i sculari d’Alata (2008), induva ùn ci era ch’è canzone, simu ghjunti à aghjustà una certa teatralisazione è dinò u ballu. » Ghjè, dunque, u fruttu di stu travagliu ch’elli prisenteranu i sculari nantu à a scena di u Spaziu Diamante stu luni dopu meziornu. L’associu « Petra Uchjata », cerca, avà, cù u sustegnu di Marie Jeanne De Franchi, cunsigliera pedagogica incaricata di prughjetti artistichi in lingua corsa, una manera di lascià una traccia pà i sculari. Quelli anu avutu l’anni scorsi, un dischettu (Mar’è muntagne, 2008, « l’arburi di u Tarraniu »,2010) o un dvd di u spettaculu di l’annu scorsu (i strumenti di u Tarraniu, 2011). Si trattaria dinò, sta volta, à long’andà, d’un allarghera di sti prughjetti per permette à d’altri sculari di pudè travaglià à nantu. Aspittendu què, u fattu d’avè più di 130 zitelli intornu à un prughjettu in lingua è cultura corsa, nantu à una scena hè, di sicuru, un bellu esempiu chì mostra chè sta lingua è sta cultura sò vive più chè mai.
F.P.