U culletivu « Parlemu Corsu » urganiseghja, u sabbatu 24 di nuvembre, una ghjurnata « stonda corsa » cù zitelli cursofuni. Una ghurnata cù ghjochi, canti, fole, ecc intornu à a lingua corsa.
Fà campà a lingua fora di u dumeniu sculare, hè quessu unu di i scopi maiò di a sucetà ughjinca per participà à a salvezza di a lingua corsa. Tandu, è ancu s’è no semu, avale, à u principiu di sta demarchja, tutte e pruposte sò benvenute. U travagliu, ch’ellu sia nantu à u tarrenu puliticu, assuciativu, economicu, spurtivu, ecc, avanza à pocu à pocu. A cartula di a lingua corsa, c’ùn impegnu maiò di tutti, sbuccherà da quì à qualch`anni. Nanzu, ci tocca à cuntinuà, sempre cù u stintu, a passione è a vuluntà. Di vuluntà, l’associu « Parlemu corsu » ne manca, chè u so travaglia intornu à a lingua corsa hè oghje, ricunnisciutu (ancu s’ellu ci hè u bisognu d’investiscesi in tutti i dumenii). Manifestazione, ghjurnate tematiche, cunferenze di stampa, ecc, Michele Leccia è so squadra, ùn mancanu d’idee per u sviluppu di a lingua corsa è a so sparghjera in a vita d’ogni ghjorni. Cusì, i respunsevuli pruponenu, u 24 di nuvembre scorsu, una ghjurnata battizata « stonda corsa » in a Riventosa. « Cù sta demarchja, spiega Michel Leccia, parechji scopi sò circati .Vulemu, prima, mustrà à i zitelli, ch’ùn sò micca soli, di i so anni, à parlà u corsu. S’agisce, tandu, d’assirinalli, chì certe volte, rimpruvarèghjanu à i so parenti d’avelli imparatu una lingua chè nim’ùn parla in a corte di recriazione. Hè per quessu chè stu ghjornu quì, circaremu di falli cumunicà cù e parsone maiò mpa sopra tuttu trà elli.Vulemu dinù incuragìsce i parenti à cuntinuà in ’ssu sensu, è sèrvasi di u so esempiu per trasmette a so mutivazione è fà chì parechji altri fèssini listessa demarchja. In fine, ci tocca à fà, una volta di più, a prumuzione di u cuncettu d’immersione. Ùn ci hè nulla di megliu chè u « bagnu linguìsticu" tutale par imparà a lingua. » L’urganizatori di sta ghjurnata anu sceltu u paese di a Riventosa per riceve « stonda corsa ». Un locu maiò induva, vint’anni fà, s’era apert auna di e prime scole bislingue di Corsica. Un locu dinù abbastanza faciule à riunghjà da ogni rughjone di l’isula. Sta ghjurnata si spiccherà in parechji atelli. Filmi (a malmignatta, ragnu corsu) a matina, amparera di a morra (dopu manghjà), fole, induvinelle, calamite (dentru a cantina), ghjochi diversi (u soldu tafunatu, a piastra, a trecca) u dopu meziornu è un caraocchè specificu per compie. L’occasioner, dinù, per i parenti, di scambià in lingua nustrale. Per tutti una manera d’avè un spaziu per l’usu di u corsu. Un di più…
F.P.