A settimana santa hà compiu dumenica scorsu. Si sà, in Corsica, ciò ch’ella riprisenta ind’a tradizione. Mumenti maiò, u ghjovi è u vennari incù tutte e so ceremonie...
A settimana santa principia, l’avemu vistu, cù l’ultima dumenica di a quaresima, quella di i palmi. Ghjè a riprisintazione di Ghjèsù intrendu in Ghjerusaleme. Dopu, hè vera chè, pocu à pocu, a tradizione s’hè scurdata di u luni, u marti è sopratttu di u mercuri chì era, in i tempi, un ghjornu impurtante di a settimana santa. Oghje, è ancu s’è i tempi sò cambiatu, a fede sparisce, a settimana santa riprisente qualcosa d’abbastanza forte ind’è noi. U ghjovi santu, ci hè l’uffiziu di e tenebre, fattu in chjesa, à lumi spinti, in cummemurazione di a morte di u Cristu. A messa hè fatta intornu à a cena, l’ultimu ripastu di Ghjèsù, incù i docedi discipuli, è tuttu stu misteru spirituale. Per i Catolichi serà u mumentu maiò di a liturgia. U messaghju spirituale ma dinò esotericu purtatu dà u Cristu. U ghjovi santu, ci sò parechje ceremonie in tutta l’isula. Participeghjanu e cunfraternite. Ghjè l’uccasione di piglià certi canti cum’è e lode di u sepolcro (davantu à u sepolcru). U versu di Tagliu, pare d’altronde assai stranu è ci tocca veramente, fora di cercà una "bella voce" ind’è u cantu per esse in cummunione. D’altri canti (Pange lingua, tantum ergo), ubi caritas (quandu si lavanu i pedi) si cantanu per sta messa. U vennari santu stà u ghjornu u più celebratu ind’è noi. Tuttu u mondu, quelli chì t’anu a fede o micca, cercà d’andà una volta in a so vita, à u Catenacciu in Sartè. Ancu s’ellu hè divintatu menu sputicu chè nanzu (cù u cummerciu è a publicità), ghjè qualcosa di maiò per a populazione sartinese, tutti i Corsi è i Catolichi. In tutte è cità paesi di l’isula, u vennari santu hè celebratu. È ci sò prucessiò cum’è quella di a Granitula in Corti, induva ci serà l’asumiglia cù d’altre tradizione pagane (più anziane). Tandu, stu ghjornu quì, ghjornu simbolicu di a morte di Cristu, un ci hè micca a messa d’ogni ghjornu (u solu ghjornu di l’almanaccu catolicu). Ci sò e litanie, prucessiò è canti cum’è u miserere, perdono mio dio stabat mater per compie. U sabbatu, s’appronta a resurrezzione di Cristu inc’una messa celebrata, sta volta, a sera vicinu à un focu maiò (quì dinò ci vole à vede una simbolica mistica). A dumenica, cù a messa di pasqua, compia a settimana santa. Un mumentu induva a ghjente pônu cummunicà è ritruvà a fede ramintendusi ch’ell’ùn tantu faciule di campà senza dà una dimensione spirituale à a nostra vita...