In umaggiu à Paulu Zarzelli, scrittore è pueta sparitu l’annu scorsu, tutti i so amichi si sò aduniti per a creazione di u primu premiu di litteratura, u 12 d’aostu chì vene, in u paese di i Peri.
Di marzu u 2011, hè spartitu u nostru amicu Paulu Zarzelli. Tutti quelli chì l’anu cunnisciutu, sanu a passione ch’ellu t’avia per a so terra, a so lingua è a so cultura. Senza sminticà u so paese di i Peri. Tarcanu maiò d’a manera d’esse corsu, fù un attore maestru per u sviluppu di a lingua corsa. Avia capitu chè ci vuli’à mantene è sopratuttu trasmette l’usi per assicurà u stintu corsu, è una cert’anima sputica. Hè, d’altronde, ciò ch’ellu hà fattu durante a so vita. Tutti i so amichi ma dinò i respunsevuli pulitichi o culturali anu vulsutu rende li umaggiu incù a creazione d’una manifestazione. Cusì hè natu u primu premiu Paulu Zarzelli di litteratura di lingua corsa è galluresa. U filu d’amparera, a casa pumuntica di lingua, in associu cù l’edizioni Cismont’è Pumonte/Matina latina, l’associu « A memoria viva di i Peri », a cumuna di i Peri, a Culletività territuriale di Corsica è u cunsigliu generale di u pumonte si sò aduniti per a creazione di sta manifestazione. Si tratta, quì, di fà scopre talenti novi fendu ch’ella spuntessi a voglia di scrive in lingua corsa. Tandu, ogni annu, stu premiu serà cuncessu à scritti in lingua corsa scelti da a ghjuria sottu à a presidenza di Rinatu Coti. I primiati videranu l’opara soia editata è spachjata da l’edizioni Cismont’è Pumonte/Matina Latina, incaricati di fane a prumuzione, in u quadru di Filu d’Amparera-Casa Pumuntica.
Quest’annu, un premiu serà attribuitu u 12 d’aostu prussimu, in paese di i Peri.
Stu premiu si spicca in duie categurie :
Scrittori novi : u candidatu deve mandà un scrittu di 20 pagine à u più, si a di sesta litteriaria (nuvella, racontu, racolta puetica, assaghju), sia d’una altra forma (prosa narrativa, puesia, teatru…).
Impinnaturi zitellini : u candidatu deve mandà un scrittu di trè pagine à u più (prosa, puesia, teatru) o genaru litterariu (nuvella, racontu, fola, puesia in rima, versu scioltu). Stu premiu hè prupostu à i zitelli è ghjuvanotti di e scole, culleghji i licei di tutta a Corsica.
U primu, sicondu è terzu d’ogni categuria averà u so scrittu publicatu da l’edizioni Cismont’è Pumonte. Averanu dinò ughjetti o prudutti d’artighjani di u locu. A ghjuria si cumponerà di Rinatu Coti (presidente), Marceddu Jureczek, Lisandru Bassani, Lisandru Muzy, Misandu Marcellesi è Patrick Salvatorini. Averemu l’uccasione di prisintà sta manifestazione di manera più larga…
F.P.