Trè centu parsone anu participatu, u 16 di ghjugnu scorsu, in Valle di Mezana, à u primu campiunati di Morra. Ghjocu anticu chì face parte di a nostra tradizione.
Quantu eranu stu 16 di ghjugnu, in Mezana. Trè centu, per certi, di più per d’altri. Pocu impreme, Alex è Isabelle Casamarte, ch’avianu mess’in piazza, sta manifestazione, ponu esse cuntenti. U primu campiunati di Morra hè stata una riesciuta maiò. Per l’uccasione, eranu ghjunti da parechji lochi di Corsica : A Gravona (è i so famosi ghjucadori), i Dui Sorri, Aghjacciu, Corti, Carghjese, Evisa… Parechji rughjoni è tutti l’età, da ghjovani (17 anni) à i più anziani. Paisani, studienti, mascii ma dinò femine, tutti eranu aduniti intornu à li stessa passione. Quindeci parsone in individuali –a maiò parte ghjovani-, vinti squadre in doppiu, è diciottu in trè, anu participatu à sta cumpetizione. « Face parte di a nostra tradizione, spiega unu trà elli, cum’è a paghjella, u chjama è risponde. » In « individuale », Ghjuvan Antò Nicoli, hà vintu a ghjustra, seguitatu da Nicolas Sanna è Ghjuvan Dumenicu Bianchi. Per i doppii, a vittoria hè stata per Jean-Pascal Armani è (torna) Nicolas Sanna. In fine, a squadra cumposta da Ange-Noël Pantaloni, Julien Orsoni è –sempre- Ghjuvan Antò Nicoli, hà vintu a ghjustra. Ci tocca à rende un umaggiu particulare à tutti sti -parechji-ghjovani chì anu fattu onore à sta manifestazione è masimu à e femine chì sò avezze à ghjucà. Oghje, a Morra si ghjoca dapertuttu in Corsica ma, mancanu, certe, volte, i spazii. Ind’a ghjurnata, un atellu per i più chjuchi era privistu. Hà permessu, per certi, di scopre stu ghjocu anticu. I più, maiò, quantu à elli, anu scupertu a filusufia di stu ghjocu anticu. D’altronde, Thierry Orsoni è Petru Poggioli sò stati selezziunati per participà à una ghjustra in Sardegna. Riprisenteranu a Corsica. I participanti è uni pochi di ghjente curiosi, anu fattu d’issa ghjurnata, un mumentu felice. Un spaziu di più induva a lingua nustrale s’hè sprimata. Sta ghjurnata hà permessu, di sicuru, di mette in vale sta tradizione. Aspittemu avale, a siconda edizione l’annu prossimu.
FP