S’in Corsica, l’usi si perdenu, quellu di u capu d’annu si mantene...ancu s’è l’estri antichi, ùn sò più li stessi...
"Bon dì è bon’ annu, è bon capu d’annu. Pace è Salute pè tuttu l’annu". Tuttu u mondu cunnosce, di sicuru, stu rituale chè no’femu quande no’scuntremu à qualchissia i primi ghjorni di l’annata. Ci vole à sapè ch’in i tempi, quande dui parsone si scuntravanu, a prima dicia, basgendu à l’altra : "Bon dì è bon’annu..." Quillaltra dicia, à tempu "Bon capu d’annu..." è inseme dicianu : "Pace è salute per tuttu l’annu". Ind’altri lochi si dicia : "Bon dì è bon’annu, è bon capu d’annu, bonu quest’annu è megliu un antr’annu..." o "Bon dì è bon’annu...dammi u me capu d’annu..." Ma chì saria, veramente, u capu d’annu in Corsica, masimu incù tutti i rituali chè no’cunniscemu ? (è ancu s’è a maiò parte sò spariti). Pare difficiule di definisce ciò chè si facia ch’ogni paese t’avia a so manera di celebrà lu. Prima, sopracena, ci n’era poch’è micca. Ci saria, quantunque, un parangone cù certi rituali di passaghju da un mumentu à l’altru di l’annata. Per indettu, pudemu piglià a festa di a Sant’Andria o quella di i Santi è di i morti o ancu quella di Natale (passaghju da u bughju à u lume). Durante a prima parte di u seculu passatu, u capu d’annu er’un ghjornu di festa. I zitelli, à spessu aduniti, adavanu à pichjà ind’è a ghjente per prisentà i so auguri per l’annu novu. Purtanavu, secondu i lochi, rami d’alivu o d’albitru (simbolu di fertilità è di vita). In certi rughjoni di l’isula, ste rame si chjamavanu e strenne. Forse, averanu datu nascita, dopu, à e strenne chè no’t’avemu avale. Ste strenne eranu dinò biscotti fatti per st’uccasione. Certi davanu una pezza d’unu o dui soldi chì riprisintava mondu per i zitelli.
À chì ne simu oghje ?
Prima, u capu d’annu, si prinsitava l’auguri à tutta a famiglia da u più vicinu à u più luntanu. Era u mumentu di piglià cuntattu incù quelli ch’eranu i più alluntanati : zii, cumpari è tant’altri. Dopu si facia u giru di u paese. Tandu, ind’è a ghjente, ci eranu sempre qualchì frutti secchi o biscotti da manghjà. Per e parsone maiò un pocu d’acqua vita...In certi paesi, c’eranu dinò rituali chì s’assumaglianu cù quelli di a sant’Andria. Si pichjava à a porta è, secondu u rituale di u paese, ci era un genaru di pricantula. I tempi sò scambiati è a maiò parte di i rituali sò spariti. I paesi sò vioti ma trent’o quatant’anni fà (siconda parte di u seculu passatu), a ghjente chì campava in cità, cullava sempre in paese u ghjornu di u capu d’annu. Tandu i zitelli -soli o in dui- andavanu à pichjà ind’è a ghjente (senza rituale sta volta) per prisentà l’auguri. Quì, i biscotti di nanzu avianu lasciatu a piazza à a cicculata è, secondu i mezi, una pezza di 10 franchi o per i più furtunati, un biglettu. Avale, ancu s’usi sò spariti. Ghjustu u fattu d’andà (o di chjamà !) ind’è i soi hè firmatu. L’anziani, elli, sortenu sempre biscotti, cicculata, vinu d’arancia, i zitelli t’averanu u so bigliettinu. Ma hè vera ch’Internet è i telefuninu anu rimpiazatu l’usi di nanzu...
F.P.