Trà cristianisimu è paganisimu
Natale face subbitu pinsà à i rigali, a festa, i ripasti tamant’à u mondu. Eccu, ciò ch`è divintata, in pochissimi tempi- è masimu c’u modu di vita, di più in più industriale- una festa cù tradizione antiche…
A sola parolla di Natale schiarisce subbitu i sguardi zitellini. Hè vera, quandu s’appronta a notte di u 24 di dicembre, chè i più ghjovani sunnieghjanu à i rigali, u ghjalgu bellu ardunatu di bucce, stelle, frisgiulette, u babbu natale. Una logica, d’una certa manera, sputica, vera, in tutti i casi. Per ciò chì tocca à e parsone maiò, ghjè u ripastu chì piglia a primura. “Cos’avemu da fà quest’annu ?” si dumanda a populazione. A dilla franca, sò pochi, a ghjente, à circà à esce di a nurmalità. Oghje, si manghja u fegadu grassu, l’ostrecci, u salmone, ghjallinaccia cù e castagne (scusate, i « Marrons ») cù parechji geneari di vini. Alcuna particularità è, più impurtante, stu rispettu di i tempi fà. Ùn ci vole micca pinsà, ne mancu, ch’era megliu nanzu. Ghjustu fighjulà a manera di campà ch’è no t’avemu avà, un modu di vistu cumerciale è l’industralisazione di u manghjà. Ci scusarete, ma ùn si po chjamà què, u mudernisimu o « campà cù i so tempi ». S’è no fighjulemu bè, per principià nantu à e tradizione ughjinche, vidimu chè u nostru famosu « babbu natale » esista, ind’è noi dapoi una cinquantena d’anni, micca di più. Piglia e so radiche in l’Auropa di u Nordu (u Santa Claus) cù San Niculau, u santu impurtante in sti paesi. Dopu, s’hè sviluppatu, à partesi di u principiu di u XXmu seculu in…America. È tandu, comu sò elli ch’avianu u pudere ecunomicu ma dinù culturale, issa tradizione s’hè sparta in Auropa. D’altre cridenze sò nate intornu à u Babbu Natale. Prima u ghjalgu adurnatu, una tradizione celtica (u ghjalgu era, ind’è elli, un simbolu di fertilisazione) è quella di fà i rigali, (d’una certa manera eranu doni di carità). À qualchì ghjorni di u sulstiziu d’invernu, u Babbu Natale si leia, tandu, cù un’altra tradizione, ceru, più sputica (bè chè…), quella di a nascita di Ghjesù Cristu. Fà nasce u bambinu à u stu mumentu quì, ùn saria micca un asardu ma una circunstenza cù un scopu precisu. À partesi di u sulstiziu d’invernu, i ghjorni sò, pocu à pocu, allugati. A corsa di u sole, entre ind’una fasa maiò. Tandu, a nascita di Ghesù à stu mumentu, s’assumigliaria à a sparghjera di u lume (à u sensu spirituale), paretutu da u bughju. Si sà, chè parechje tradizione, oghje, cristiane, piglianu e so radiche in u paganisimu. Nanzu, i issi termpi antichi, assai riti, è masimu i riti celtichi, eranu riti intornu à u sole. Tandu, i mumenti di a vita, eranu fatti in ritimu cù a natura (Gaïa ind è a greccia antica) è què ci ramenta, à noi altri corsi, ch’è no semu più vicini di ste tradizione chè di quelle « muderne ».
F.P.