Hè in vendita u terzu dischettu di l’associu "Dopu Cena" inc’una particularità maiò. Si cumpone di sedeci canti tradiziunali registrati, fora di dui pezzi strumentali, senza accuciamenti. L’inseme hè u sopu d’un travagliu fattu in u 2010 è 2011.
Dopu à "Sciansgedama" (2007) è "Trasmetta" (2009), l’associu "Dopu Cena" hà cacciatu u so terzu dischettu : "Canti è soni di l’isula persa". Un viaghju ind’è u tempu induva si truveranu pezzi antichi cantati da ghjovanni d’avale è parsone più anziane. Dopu à pezzi musicali è creazione, si tratta, quì, d’u cantu tradiziunale tale quale. A maiò parte sò di u pumonte, ma dinò di Cismonte o di u centru di l’isula (A Soccia, Aitone). "À principiu, spiega Michele Solinas, u scopu, ùn era micca di fà un dischettu. ma di cantà, solu per u piacè. Strada facendu, hè nata a voglia di fane unu ma incù l’intaressu di trasmetta qualcosa, di mustrà una parte sputica di u cantu." Dopu Cena ripiglia dunque assai canti dighjà cunnisciuti cum’è "Lisabedda", "L’almanaccu", "Diana di l’Alba" racolte, d’altronde, da Michele Paoli di Zicavu ma dinò d’altre forme di u cantu tradiziunale : i lamenti (lamentu d’Antuninu, lamenti di Ghjuvan Cameddu), i canti d’amore (Manetta), e nanne (Ninni Nanna). È per ciò chì tocca à a musica, avaremu dui valsi buzinchi (u valsu di Filippone, u valsu sermanacciu).
Mantene u filu
Ci sò, in tuttu, sedeci pezzi o canti tradiziunali. A particularità di stu dischettu, ancu s’ell’ùn piacerà, à tuttu u mondu, hè chì fora di i dui valsi sunati à u viulinu (incù un timpanu), ogni pezzu hè cantatu senza strumentu. "Cusì, avvemu vulsutu mantene u sensu anticu. Ci serà forse, menu sputichezza chè nanzu ma, ind’è sta manera di cantà, ci hè qualcosa di cumunu. U filu hè mantenutu..." Cusì, d’un cantu à l’altru, si scuprerà, per quelli ch’ùn sò tanti avvizzatti, voce sputiche, versi antichi è archittate di nanzu. Una scumessa riesciuta da tuttu quelli ch’anu participatu à sti registramenti. I membri di l’associu cum’è Michele Solinas, Lea Antona o Ghjuvan Michel Weber, ma dinò altri cum’è Anna Rocchi (Ninna Nanna, Nanna d’Aitone), Ghjuvan Petru Bozzi, u sgiò merre di Furcioli chì ripiglia à l’usu anticu, un cantu di u so paese (Manetta) senza sminticà à Natali Valli chì ci canta u lamentu di Ghjuvan Cameddu à modu soiu (Purti-Vechju) ma incù stu qualcusellu di sputicu. "L’avvicinanza cù e parsone hè per noi, assai impurtante. Per Natali Valli, ghjè a prima volta ch’ellu registrava un cantu tradiziunale. U lamentu hè cantatu tale quale cum’è l’avia intesu da u so ziu. D’altri canti t’anu dinò una particularità. Pensu à "Lettera à Mamma" cantatu senza pulifunia per mette in vale a puesia." Marcantone Fantoni (13 anni), ci canta "Niscintria di branu". In fine, Gjuvan Battista Albertini ci ramenta ind’u so prifaziu, chè campà a musica di a so epica, ùn vole micca dì sol’ incù i ritimi d’oghje o a musica uccidentale. Ancu s’è e funzione suciale sò sparite o cambiate, è cù n’elle certi genari di cantu tradidiziunale (tribbiera, lamenti, voceri, ecc...), diventa una primura, per tutti quelli chì sò sempre passiunati di stu cantu, di mantene stu filu, di radicassi dinò ind’è i ritimi è e manere di cantà di nanzu. È ghjè quessu, dinò, u scopu di l’associu "Dopu Cena" : "Fà a musica d’oghje cù quella d’eri..." L’associu travaglia, avà, nantu à un quartu dischettu, circhendu à tempu, di registrà, sta volta pulifunie prufane è sacre di Castagniccia...
F.P.