L’aiutu di i musicanti corsi
Natu in u 2004, stu situ, fattu da Sébastien Antoniotti, passionatu di musica, hè divintatu in pocu tempu, un aiutu maiò per tutti quelli chì cercanu accordi di ghitara o ancu parolle di canzone. Un sustegnu, oghje necessariu.
Sébastien Antoniotti hè passiunatu di musica. Sunadoru di ghitara, hà avutu l’idea, sett’anni fà, di creà un situ di musica per tutti quelli chì sò, cum’è ellu, passuniati. Ci conta a so storia : "À principiu, aghju vistu chè ci eranu parechji siti di musica incù l’accordi di ghitara. Ma eranu tutti siti di canzone francese o di "world Music". Per quelli chì principiavanu a ghitara, quì in Corsica, è chì vulianu travaglià intornu à u cantu corsu, ùn ci era nulla." À l’epica, Sébastien è uni pochi d’amichi, avianu fattu un gruppu di musica "strada nova". "Circavamu accordi di canzone. Tandu, aghju fattu stu situ." Hè vera ch’era qualcosa d’abbastanza faciule postu ch’ellu travagliava intornu à l’infurmaticu. Cusì hè natu "Sunemu.net". Prima, ci eranu una cinquantena di canzone di i gruppi i più impurtanti di l’Isula : "Canta u Populu Corsu", "I Muvrini", "I Chjami Aghalesi", "A Filetta".
42 artisti, 700 canzone è accordi
Un annu dopu, u situ hè crisciutu è Sébastien, ùn aspittava micca stu successu. "Aghju scuntratu ghjente ind’è e fiere o cuncerti, ghjente cum’è Antone Marielli (Diana di l’Alba), dicianu ch ’elli s’arribavanu nantu à "Sunemu" per e so scole di cantu o u travagliu incù i sculari. Tandu, aghju capitu chè u situ era, in pocu tempu, divintatu impurtantu." Oghje, sett’anni dopu, "Sunemu" riceve più di 600 visite à u ghjornu. U situ si spicca in parechje temi :
Artisti incù una scheda di prisentazione
Gruppi, sopratuttu per i principianti
attualità. Leia cù d’altri siti d’infurmazione (per indettu Alta Frequenza...). Ma dinò attualità nantu à i gruppi o l’artisti. "Sò elli chì mi mandanu l’infurmazione."
Forum. Per fà cumenti nantu à a musica, scambià idea, dumandà rinsignamenti accordi o parolle...
"Ci vole sapè, dice Sébastien Antoniotti, chè nanzu sò èiu chì mettiu canzone o accordi nantu à u situ. Oghe, sò i gruppi chì mandanu e so schede cù l’infurmazione. È u situ cresce cù u so aiutu postu ch’elli danu accordi è parolle di amaiò parte di i gruppi d’avale."
Un aiutu necessariu
Cusì, dapoi u 2004, "Sunemu.net" hà raccoltu 42 artisti è più di 700 canzone (ogni volta cù l’accordi di ghitara). È più ricercate ? "Bella Ciao", "Versu tè", "Ricordu", "A serva", "Che Guevara", "A Sinfunia Nustrale", "Furtunatu"... Per ciò chì tocca à i gruppi, i più impurtanti sò "I Chjami Aghjalesi" (82 canzone), "Canta u populu Corsu" (79 canzone), "I Muvrini" (30), "L’arcusgi" (47) è "Diana di l’Alba".Ci sò, à tempu gruppi cunnisciuti cum’è "Tavagna" "I Surghjenti" , "Voce Ventu" o d’altri, menu cum’è "L’attrachju", "Vitalba", "Primavera"... Ogni volta, u musicantu, ch’ellu sia principiantu o micca, po ritruvà i so accordi sottu à e parolle. E per quelli chì t’anu sempre a nostalgia di e canzone di prima, ci sò qualchì canti è musiche tradiziunali cum’è "Cùn voi madamicella", "l’Ultima strinta", "Solenzara", "La boudeuse" "Valinco" è ancu "u valsu aiaccinu" senza sminticà Antoine Ciosi (5) o Carlu Rocchi (6). "Per avà, dice Sébastien Antoniottti, u situ viaghja abbastanza bè. U numaru di canzone è d’accordi cresce sempre." Per quelli chì volenu travaglià a canzona corsa, "Sunemu.net" hè divintatu un aiutu maiò, è ancu necessariu.
F.P.