Levie in tempi di u Medievu
A dumenicata di u 14 di settembre prussimu, a cumuna di Levie s’appronta à urganizà a terza edizione di e so medievale. L’occasione, trà storia, patrimoniu è cultura, di festighjà…
« Levie in tempu di u medievu », eccu à scumessa di tutti, populazione, eletti o passiunati, nata in u 2011 per fà nasce una dinamica ecunomica è cultura in u rughjone. Cusì, e duie prime edizione, anu messu in vale l’impegnu maiò di a ghjente, sustenuta da a CTC, a cumuna senza sminticà Marie Jeanne de Lanfranchi, respunsevule di u museu di Levie, à l’origine di a manifestazione. Tandu, nim’ùn vole scurdassi di stu terzu appuntamentu, cum’è sempre, accunciatu in u quadru di e ghjurnate di u patrimoniu.
« E prime edizione anu mustratu a vuluntà di tuttu u mondu d’impegnassi nantu à stu prughjettu, spiega Marie Jeanne de Lanfranchi, u museu hè un locu di vita è di sapienza, ghjè a so leia cù a populazione chì face u sucessu di e medievale. Per quest’annu, ci serà li stessa andatura è speremu li stessa dinamica. U scopu è di, à long’andà, pudè stallà sta manifestazione, aghjustendu, ogni volta, qualcosa di novu. »
Cavalieri, monachi, sumeri, muli, case adurnate à i culori di st’epica, pranzi cù robba di u medievu, principe è principesse, sunadori di strumenti, eccu ciò ch’ellu serà, u paese di Levia durante trè ghjorni. L’occasione, dinù, di pudè scartabellà qualchì pagina di a storia di Corsica, di stu paese è di u rughjone…
F.P