Stu sabbatu 9 di ferraghju, a scena di l’aghja prupone, in leia cù l’associu assai cunnissciutu “Jazz in Aiacciu” a 5m’edizione, “Jazz in Aghja”. Un appuntamentu chè l’amatori di sta musica ùn mancheranu per nulla !
Tuttu u mondu, in a cità imperiale, cunnosce o averà intesu parlà di « Jazz in Aiacciu » chì, ogni volta, riesce à spiazzà i più famosu specialisti di stu genaru musicale. Hè vera chì l’associu di Marcel Guidicelli, pasiunatu di Jazz, hà fattu, dapoi dodec’anni, e so prove. Ma s’è « Jazz in Aiacciu », cunnosce un sucessu maiò, masimu à u principiu di l’estate, a so piccula « surella », « Jazz in Aghja », face, à pocu à pocu, à so strada.
Duie ore di musica
Cinqu’anni fà, trè passiunati o attori (Marcel Giudicelli, Jean-Jacques Gristi è Francis Aïqui) si sò aduniti, ognunu cù e so cumpentenze, per fà nasce sta manifestazione. Ma incù una manera sfarente di sviluppà la. Di fattu, l’idea hè simple : i dui associi (Jazz in Aiacciu è l’Aghja) sceglienu un capu sunadore. Tocc’à ellu, dopu, d’invità i musicanti ch’ellu vole per un cuncertu di duie ore. « U scopu hè di fà rinasce u spiritu anticu di u jazz, spiega Francis Aïqui, direttore di l’aghja, senza sminticà di sviluppà un ambiente particulare. » Per sta 5m’edizione, Jean-Jacques Gristi, famosu sunadore di ghittara, hè statu sceltu. « Avemu avutu iss’idea, ripiglia Francis Aïqui, per esse in leia cù u 60mu anniversariu di a morte di Django Reinhardt. » Cusì, Jean-Jacques Gristi conta di marcà trè epica di a vita di Django : l’anni 30, dopu à a guerra, è l’anni 50 cù l’apparizione di a ghittara eletrica. Vicinu à ellu, ritruveremu i so amichi sunadori cunniscuti in Aiacciu è ancu in altrò : Jean-Marc Jafet (Bassa), Eric Testeguide (Pianò), Antoine Ferreya (viulinu) ma dinò Jean-Paul Frigara, Paul Aiuti è tanti altri. Tutti anu da ripiglià pezzi di django ancu, rispittendu u spiritu di u jazz, impruvisazione. A struttura di l’aghja serà, per contu soiu, accunciata in u ambiente jazz. Serà, cusì, un primu passu ver di l’apruntera di a 12ma edizione di « Jazz in Aiacciu », da u 25 à 29 di ghjungnu, cù, si dice, uni pochi di i più grandi musicanti d’avà. Frà elli, Michel Jonasz, Florin Niculescu è… Birelli Lagrène.
F.P