Un librettu per a mess’in vale di l’agricultura identitaria
L’ODARC, in cullaborazione cù u CRDP di Corsica, e filiere prufessionale, prupone, incù “Gusti di Corsica”, un librettu publicatu quest’annu, una descrizzione di l’agricultura corsa, trà i so prudutti ma dinù u so modu di produzzione. Ghjè, à tempu, una messa in vale di i pruduttu, è di i prufessiunali di u mondu agricolu isulanu.
Clementina, pumelu, castagna, casgiu, vinu, mele, robba purcina è oliu d’aliva, sò tal’è quale i prudutti corsi ch’ellu conta di sviluppà l’ODARC, capiprughjettu di « Gustu di Corsica », in un librettu di 50 pagine, editatu cù u CRDP di Corsica, è à a dispusizione di i sculari ma dinù di e parsone maiò. Per ogni pruduttu, ritruvaremu rinsignamenti precisi nantu à a famiglia, fronde, cugliera, u sviluppu in Corsica (per i frutti) o altri. Una parte sfruttera permetterà dinù d’allargà a tematica c’un lessicu, ducumenti è uni pochi di dumande per i sculari o e parsone maiò. Per a castagna, pruduttu maiò di l’agricultura corsa, masimu liatru à a sucetà tradiziunale, si prisinterà a storia, fattura di u legnu, trasfurmazione di u fruttu (zozuli per indettu). Ci vole à sapè chè si cuntaianu, tempi fà, 50 varietà di castagni sfarenti ! Si tratterà, dopu, di u mulinu tradiziunale, i piatti antichi (pulenta, nicci, granaghjoli), ecc… Altru pruduttu liatu à a sucetà tradiziunale, a robba purcina, cù prisintazione di a razza « nustrale » di porchi corsi (parte di l’animale) è di i so famosi prudutti (ficatellu, salamu, prisuttu, coppa o lonzu, ma solu i trè ultimi anu l’AOC per avale). Serà, di fattu, cusì, per l’inseme di i pruduttu prisintati. Prudutti chì t’anu tutti l’AOC. Jean-François Cubells, Marie-Laure Marquelet è Ghjuvan Michel Weber sò l’autori di stu librettu traduttu in corsu cù l’aiutu di Ghjuvan Michele Weber è Ghjuvan Battistu Paoli. Un librettu pedagogicu, cù scritti è dissegni chì dà tutti i rinsignamenti necessarii nantu à ste filiere. Ci si trova dinù, per compie, tutte l’indirizze di i sindicati, associi, centri o camere cuncernati. Un prughjettu chì hè sbuccatu in u quadru di u u prugramma auropeanu Marittimo in leia cù d’altre rughjoni di u mediterraneu (Sardegna,Tuscana è Liguria).
F.P.