Un passu ver di l’amparera
Principianu stu 27 di ghjennaghju, e dumenicate di a lingua corsa. U scopu hè di furmà a ghjente à i nivelli A2 è B1 di u quadru auropeanu. Un passu di più ver di l’amparera di a lingua, masimu fora di u solu quadru sculare. Stu prughjettu hè natu da u Greta, incù l’aiutu finanziaru di a CTC.
Amparà a lingua corsa, andà dopu, à scuntrà a ghjente in situazione, esse capace di parlà, leghje è scrive, ghjè quessu, à long’andà u scopu maiò di e dumenicate. Stu prughjettu hè natu in u 2009 da u Greta, una struttura chì travaglia, d’altronde, in leia cù u serviziu di a lingua corsa di a CTC. "Durante i dui primi anni, spiega Ange-François Filippi, cunsiglieru in furmazione cuntinua, era solu una prova. Principiemu inc’un mudellu novu, un nostru prughjettu questu annu incù u sustegnu finanziaru di a CTC."
Trè nivelli d’amparera
À partesi di stu 27 di ghjennaghju, a sessione 2012 di e dumenicate principierà. I studienti (parsone maiò) anu da riceve sin’à a fine di ghjugnu, una furmazione in lingua corsa nantu à parechji temi:capiscera, spressione è cuntrasti, spressione in cuntunuvu (sapè spiegà un tema), lettura è scrittura (esse capace di capisce u sensu d’un scrittu).Trà quattru è sei prufessori ( per avale Tiadoru Courteaud, Anthony Secondi, Dea Mondoloni è Petru Luccioni) sò incaricati di dà sta furmazione chì si face di trè nivelli sfarenti : -A2 (cullegiu), A2 Parenti (specialisazione chì li permette d’accumpagnà i so fighjoli per l’amparera di a lingua corsa), è B1 (parsone capace di sbrugliassi in guasgi tutte e situazioni). I corsi saranu dati à u liceu Fesch, u vennari (da 6 à 8 ore di sera) è u sabbatu (matina o a ghjurnata sana) trà una è trè volte à u mese. "E sequenze sò più longhe, ripiglia Ange-François Filippi, trà trè è sei ore di furmazione ogni volta." Fora di st’ampera, i studienti andaranu nantu à u tarrenu, à scuntrà ghjente nantu à temi precisi cum’è l’arte (u museu Fesch), e piante, i pescadori o a musica. Cusì, avaranu a pussibilità di mette in pratica -ghjè u scopu ricercatu- ciò chì hè statu amparatu durante issi sei mesi.
U certificatu di lingua corsa di ghjugnu
Ci serà, dinò un cuntrollu cuntinuvu è a valutazione individuale d’ogni parsona. Per avà, ci hè una vintena d’iscrizzione. À a fine di ghjugnu, tutti quelli ch’anu participatu à ste dumenicate saranu scritti per passà u certificatu di lingua corsa. "Ghjè un altru scopu, saranu appruntati per a sessione di u 2012, à a fine di ghjugnu. A nostra primura hè di dà una furmazione precisa in lingua corsa, à ste parsone. T’avemu, per avà, assai dumande, u prughjettu avanza abbastanza bè." Surtendu di u solu quadru sculare, ste dumenicate sò di sicuru, un primu passu ver di u sviluppu di a lingua corsa ind’ a sucietà.
F.P.
Iscrizzione
Aiacciu : 04-95-51-60-83
Bastia : 04-95-54-53-30
Purti-Vecchju : 04-95-70-72-92 o 06-20-41-18-56