Suarellese di 48 anni, Andria Flori hè un omu passiunatu di genealugia. Sò, avale, guasgi 15 anni ch’ellu passa u so tempu à « spuglià » tutti i registri di u cantone è ancu d’altrò. Una passione induv’ùn si contanu micca l’ore senza circà aspettu suldarinu…
In Corsica, a genealugia face a so strada, masimu cù a leia chè ognunu cerca di fà cù i so antenati. Quì è cullandi, sò, cusì, parechji à parte à a ricerca di i soi. Andria Flori hè di quessi. Sta pasionne hè nata à l’iniziu di l’anni 2000. « U me babbu, Ghjuvanni, avia disgià fattu assai ricerche, spiega u Suarellese, quandu hè sparitu, in 1987, aghju fighjulatu tuttu u so travagliu. È, à pocu à pocu, sò cascatu ind’a « pignatta ». Hè nata a passione di sta ricerca. Un amicu vulia fà un situ cù e racolte di tuttu u monde. Hè cusì chì mi sò impegnatu ».
350 famiglie di a pieve di Sampieru
Tandu, stu passiunatu principia à « spuglià » i registri di u paese. Battesimi, nascite, matrimonii, doli, ci passanu tutti dopu à ricerche fatte, per a maiò parte, à l’archivi diparmentale di u Punmonte ! « Aghju ripigliatu u travagliu di babbu. Avia ricercatu da 1717 à 1820. Aghju cuntinuatu sin’à oghje. » Dopu à un annu di ricerche in Eccica Suarella, Andria Flori decise di sparghje e so ricerche in tutta a pieve di Sampieru. Prima Cavru è Bastelica eppò dopu Ocana è Tolla per ghjunghje, in fine, à una ricerca maiò da u 1912 (1936 per i matrimonii) à 1700 (1650 per i più vechjii registri. Statu civile, registri paruchjali, cuntera (di u 1770 è u 1818), documenti nutariali, cuntrati matrimuniali, Andria Flori passa a maiò parte di u so tempu per studià tutti l’atti necessarii à e so ricerche. Per sbuccà, dopu à 13 anni di travagliu, à 300 à 350 famiglie di a pieve. I più anziani ? Geronimo Folacci è Giopaulo Flori, nanzu à u 1600.
Una basa di 100.000 parsone
« Sta basa, ci permette d’avè rinsignamenti nantu à a storia di peive, ripiglia u Suarellese. Ma u so travagliu, ùn s’arresta micca quì. Dopu à a pieve di Sampieru (travagliu chì, d’altronde, ùn hè ancu compiu), Andria Flori sparghje e so ricerche in u bassu Taravu. Santa Maria Sicchè, Albitreccia, Guargalkè, Urbalacone, Grussetu, Campu, Azilone, Furciolu…riesce dinò, in sti lochi quì à avè una basa impurtanta (statu civilu da u 1822 à u 1936. È s’attaca, avà, à Zigliara è Cugnuculi. « Aghju dinò principiatu ricerche in Aiacciu cù i matrimonii da 1720 à 1745 è 1768 à 1818. » Ciò chì ci da, in tutti, una basa di…100.000 parsone, è, à pocu pressu 10 ore di ricerca a settimana. Un travagliu chì, ci vole à dilla, si face solu per a passione, è senza alcun aspettu suldarinu. Oghje, u travagliu d’Andria Flori, l’hà permessu di fà trà 200 è 250 documenti (arburi). L’avvene ? « Vogliu compie u travagliu in Santa Maria è u rughjone è, di sicru, publicà tuttu ciò ch’aghju fattu. È andà, dopu, in Ghjenova à travaglià nantu à i registri di taglie (imposizione) chì ci anu da dà rinsignamenti nantu à i paesi. »
I scontri di a genealugia, l’ottu d’aostu, in Venacu
U sei d’aprile, Andria Flori darà, in Cavru, una cunferenza nantu à e so ricerche cù l’origine di u so travagliu è a particularità ch’è no scuntremu in Corsica. U 10 d’aostu, ci seranu i scontri di i genealugisti di Corsica in Venacu. « U so scopu serà di mette in cumunu u nostru travagliu, di dà cunsiglii à a ghjente è, à più o menu long’andà, d’avè una basa impurtante a dispusizione di a populazione. » Un travagliu, chì, cù a creazione d’un situ, pudaria permette à i Corsi di ricercà d’un colpu, è senza spiazzassi, i so antenati. Ma, per un nostr’amicu suarellese, a passione, ella, ùn hè spenta. Tandu, u vidaremu, torna, à spuglià registri è registri. Sparghjendu, ogni volta, e so ricerche, più luntanu. À u serviziu di i Corsi. U travagliu d’una vita sana…
F.P.