Dopu à 44 anni, a pratulina di Timizolu hè stata rifatta. Un travagliu di trè settimane chì permetterà, avale, à l’Aiaccini d’avè un spaziu di ghjocu in rapportu cù e so ambizione.
Vi ramintate quandu hè statu fattu u stadiu di Timizolu ? 1969. È per esse precisu, hè statu ufficializatu u primu di dicembre di li stessa annata (ACA-Bastia). A pratulina, quant’à ella, era stata fatta un annu nanzu. Sò, avà, parechj’anni anni chè ghjucadori, addestratori o dirigenti ricivuti in Aghjacciu si lagnanu di u statu di tarrenu di l’ACA. Pratulina secca o troscia, tarrennu carcu di tavoni, sfurmatu. Per elli, s’è, per disgrazia, annu persu a partita, cercanu quessa a scusa. Ma sò l’Aiaccini i primi à esse penalizati d’ùn pudè sviluppà un ghjocu piacevule. Ind’a so logica di fà cresce a so squadra ma dinò e so strutture, dapoi avà, qualch’anni, i dirigenti di l’ACA anu dicisu di rifà u tarrenu o piuttostu a pratulina. Principiata i primi ghjorni di lugliu, sta pratulina hè stata compia a settimana scorsa. Hè stata posta da una sucetà spagnola, li stessa ch’avia travagliatu, d’altronde, in Furiani ma dinò in Barcelona o Milanu. Sottu tarra, l’operai di a sucetà anu postu cundutti per l’acqua è vinti cinqui cannelli per l’innacquera. Un’operazione chì averà custatu, in tuttu, 480.000 e. À tempu, l’ultima fasa di rifacimentu di u stadiu s’avvicina. Quest’annu, a tribuna « onore » serà rifatta. Durante stu tempu, un’altra, da u cantu di u mare, è d’una capacità di 1800 piazze serà appruntata. Da sopra a tribuna Faeddan trè parolle « stintu », « populu », « nazione », mostrenu l’a ndatura è e valore ch’ellu conte di svilluppà quest’annu l’ACA. L’inaugurazione di stu nuvellu spaziu di ghjocu di François Coty (nanzu d’esse battizatu stzdiu Michel Moretti in umaggiu à u so presidente) serà fatta, stu vennari da…u GFCA chì riceve à Caen in u quadru di a prima ghurnata di u campiunatu di Liga 2. I « rossi è bianchi », quant’à elli, devenu aspittà u 18 (o 19) d’aostu, è a ghjunta di Pariggi cù e so stelle. Foc’à a ceppa !
F.P.