A dumenica di i palmi apre a settimana santa. Ghjè, in Corsica, un mumentu maiò di a liturgia, seguitatu cù fede, da tutta a populazione isulana...
Issa dumenica marca, in Corsica, u mumentu u più impurtante di a liturgia : u principiu di a settimana santa. Ind’è noi, si sà ciò ch’ella riprisenta, per a ghjente, a fede è, d’una manera generale, a religione. È, cum’è tanti altri paesi o rughjoni di u Mediterraneu (Spagna, Italia, meziornu di a Francia, Sardegna), l’isula s’appronta, ogni annu à li stess’epica, à campà cù fervore, stu tempu liturgicu. Dapoi u cunciliu di Nicée, in u 325, u ghjornu di Pasqua hè fissu a prima dumenica chì seguita a luna piena dopu à l’equinoziu di u Veranu. È ci serà, intornu à sta data (chì secondu à l’almanaccu, po scambià), parechji tempi forti : a dumenica di i palmi, chì celebreghja l’intrata di u Cristu in Ghjerusaleme, u ghjovi, vennari è sabbatu santu chì marcanu u tempu forte di a settimana, è a dumenica chi celebreghja a so resurrezione. Passione, morte è resurezzione di u Cristu rirprisentanu monda per i Cristiani è masimu in Corsica (induva, in certi lochi, tradizione religiosa è paganisimu saranu bulicate). Si principia dunque cù a dumenica di i palmi. Ind’è noi (parecheji peasi è rughjoni di l’isula) ci sò, ben intesu, e rame d’alivu accunciate cù quelle di palmi. A benedezzione di i palmi avaria principiatu à tempu à sparghjera di u Cristianisimu i u Tarraniu. U rituale -vicinu di l’arte- face attreciulà rame di palmi. Ma ci vole, prima, un culore specificu (vicinu di u giallu chjaru). Tandu, d’’uttobre, si caccianu i cori è sò messi fora di u sole è di u lume per uttenne stu culore. Quandu a perioda liturgica s’avvicina, a ghjente cummencia à fà rame di palmi è crucette. In Aiacciu, per indettu, un mese nanzu a dumenica di i palmi, e parsone e più anziane (quelle chì cunnoscenu sta tradizione) sò piazzate in parechji carrughji di a cità (per u più, vicinu à u mercatu) è facenu rame è crucette davantu à a ghjente. Ognunu t’hà u so sicretu trasmessu da l’antichi. U ghjornu di i palmi marca dinò l’ultima settimana di a quaresima. Sta dumenica, i palmi sò benedetti è si entre in ghjesgia cù un cantu allegru : u "Vexilla Regis" chì riprisenta l’intrata di Ghjesù in Ghjerusaleme. A settimana santa è principiata è dapertuttu in Corsica, a populazione s’adunisce per celebrà cù fervore stu mumentu particulare. Ghjè ora, dinò per tutte e cunfraternite di participà à a liturgia...
F.P