In u quadru di a prima settimana di a lingua corsa, chì s’hè compia sabbatu scorsu, parechji sculari si sì impegnati, ognunu à u so nivelli. I zitelli di a scola materna di Vulpaghja, in u circondu d’Aghjacciu, anu participatu à sta manifestazione cù duie pitture ch’elli anu fattu à partesi di u tema « Demo et des lettres »…
« Inseme » è « Alegria ». Sò e duie parolle scelte da i sculari di a scola materna di Vulpaghja (sezzione di i maiò) per participà à a prima settimana di a lingua corsa, da u 4 à u 10 di ghjugnu. Vinti cinqui sculari si sò impegnati in u quadru di l’atellu « Demo et des lettres », messu in piazza da a merria d’Aghjacciu sottu à a direzzione di a CTC. Cusì, ci eranu ind’è st’atellu, trenta parolle sfrarente è ci vulia, sia fà una puesia (per i più capaci è forse i più maiò) o dissegni per l’altri. Ognunu devia fà una riprisentazione di certe parolle scelte, à modu soiu. A scola di Vulpaghja hà decisu di participà cù a direttricia, Valérie Acquaviva, Muriel Gomez, maestra è chelli chì l’anu sustenute. Tandu, i sculari (vinti cinque) anu sceltu, cù a so maestra, « Inseme » è « Alegria » duie parolle ch’elli anu riprisintatu di manera culletiva incù i so ochji zitellini. Tandu, stu travagliu hà sbuccatu nantu à duie pitture : un sole tamantu, arancia è giallu per « Alegria » è un pannellu cù parechji parsunaghji nentru per « inseme ». « I zitelli si sò veramente impegnati in questa demarchja, spiega Muriel Gomez, a so maestra, sò elli ch’anu sceltu, à partesi di e parolle, i dui dissegni. » U fruttu di stu travagliu facia parte d’un’espusizione culletiva (cù d’altre scole) u marcuri 6 di ghjugnu scorsu à u spaziu Diamante. Un primu passu, per sti zitelli, ver di l’amparera di a lingua corsa.
F.P.