Dapoi anni è anni, a Santa adunisce, intornu à a religione ma dinò a cultura, a populazione ghjunta da tutti i lochi di l’Isula è ancu d’altrò. Hè segnu chì, ancu s’ell’hà persu u pocu di u so spiritu anticu, a più anziana fiera di Corsica si porta bè.
« Tutti l’anni di sittembre à la santa di Niolu… ». Ste parolle, scritte da u famosu pueta Pampasgiolu in u1928 ind’a canzona « A santa di Niolu » (13 strufate) sò testimonie d’un modu di campà chì, à pocu à pocu, si n’hè sparitu in Corsica. Nata, cinque seculi fà inc’una tradizione religiosa*, ciò chì era, à, principiu una festa religiosa, s’hè sviluppatu, accantu, per divintà, à partesi di a fine di u 19mu seculu, un locu maiò di scambii economichi. Si ghjunghjia, tandu, da tutti i lochi di Corsica per cumprà, vende, scambià (vede a canzona) ma dinò cantà (paghjelle) o impruvisà. Minellu d’Ascu, Pampasgiolu, u Furcatu è tanti altri anu passatu nuttate sane in campu di fiera. Ghjera l’uccasione di mustrà a so robba, l’animali è di fà u « pienu » per l’annata, masimu nanzu di entre in invernu.
L’estru anticu in questione
L’anni sò passati. A fede religiosa, cum’è d’altronde in tutti i paesi di l’isula, hè sempre li stessa. Cusì, ogni 8 di sittembre, a vergine Maria hè celebrata. Ùn si contanu più i fideli, ghjunti in ghjesgia, nantu à a piazza, participà à a processiò cù a granitula è u so caratteru misticu, cantà à mezu à e cunfraternite. Ghjè u mumentu maiò di sti trè ghjorni è u principiu di a fiera. Una fiera chì, ci vole à dilla, hà persu, incù u tempu, un pocu di u so estru anticu. Hè vera chì a sucietà d’oghje, ùn hà nulla chì vede cù quella di nanzu. Ci era una certa rinascita in leia cù i tempi fà dopu à u riacquistu (anni ottanta è novanta) ma stu stintu hè sparitu. « A fiera di Niolu s’appoghja nantu à a fede è u caratteru religiosu, spiega un abitante di u rughjone, ma ùn ci hè micca una vera riflessione nantu à u so sviluppu in leia cù a tradizione. Oghje, ci vole à ricunnosce chè d’altre fiere anu francatu u tempu tinendu sempre u stintu tradiziunale. È quessu, ùn l’avemu micca fattu. A primura hè l’intaressu suldarinu. »
Ottanta atelli, 10000 parsone à u Ghjornu
L’urganisatori, per contu soiu, cercanu, ghjustamentu, di mantene un caratteru sputicu. « A fiera hè addatata à l’usi d’oghje, dice unu di quelli, t’avemu sempre l’artisgiani chì mostranu i so prudutti, qualchì atelli per I più chjuchi, uni pochi di gruppi culturali per l’animazione musicale. Ci serà un atellu di cavalli incù un cuncorsu à dinò una corsa à spinu à sumere. L’ambiente hè sempre li stessa dapoi anni è anni. Di più, casca, quest’annu, in dumenicata. Aspitemu dunque u mondu ». Ottanta atelli –per a maiò parte d’artisgiani- seranu in piazza in campu di fiera per un’edizione, chì malgratu u tempu chì hè fughjitu, un aspettu economicu chì hè scambiatu è l’usi chì sò spariti, aduniscerà 10000 parsoni per ghjornu. Hè segnu chì a Santa hè sempre viva…
F.P.