Una tradizione sempre viva
L’abitanti di u cantone di i dui sorri, è ancu d’altri (u circondu d’Aghjacciu) sò ghjunti assai numarosi, stu 16 è 17 di lugliu sopra u paese di Rennu per a 92ma fiera di San Roccu. Trà estru anticu è mudernità, sta fiera hè stata, cum’è sempre, una riesciuta…
A fiera di San Roccu, nata in u 1920, ùn hè micca solu una di e più anziane di Corsica. Stu locu, piazzatu à mezu à i castagni, hè sempre statu l’appuntamentu di i pastori è di l’abitanti di u rughjone, ma dinò d’altri. Una fiera sputica, nata da Ghjuvan Battista Mattei, merre di Rennu à l’epica. Quellu, avia trovu u mezu di fà una fiera, in leia cù a tradizione religiosa di Rennu : u 16 d’aostu, ghjornu di a San Roccu, patrone di u paese.
Una leia suciale
Tandu, si ghjunghjia da parechji lochi di l’isula per scambià, cumprà, vende i prudutti corsi. Mumentu impurtante per a ghjente, è masimu i pastori chì pudianu vende ancu l’animali. Era dinò un locu induva si festighjava (canti, balli, chjama è risponde, ecc). Una vera leia suciale. Joselyne Mattei-Fazi, merre di Rennu, hà ripigliatu, trent’anni fà, l’estru anticu di u so missiavu. È, à pocu à pocu, a fiera s’hè sviluppata senza perde, ne mancu, u so caratteru sputicu. Certe, ci sò sempre uni pochi di ghjochi per i zitelli è i maiò ch’ùn anu nulla à chì vede cù l’estru di nanzu, ma, dapoi l’epica di u riacquistu è a messa in vale di i pruduttu artisgianali, a fiera hà trovu un altru fiatu. Sta festa religiosa, mischiatta c’una fiera pupulara, hè stata una riesciuta maiò per l’urganisatori. A messa è a processiò chì seguitò, anu mustrata, u primu ghjornu, chì ci hè sempre a fede in i nostri paesi. Pà u restu, parechje animazione per i chjuchi o i maiò (vitture culpite, motò, ghjochi diversi), ghjustra di ballò, di buccie, sò state priviste. U cuncorsu di mora, uni pochi di paghjelle cantate, una spassighjata à spinu à sumera è i ripastu tradiziunali (tripette corse, tianu di vitellu) anu fattu sta leia cù i tempi fà. Ma u fattu maiò di st’edizione, hè stata u 17 d’aostu per festighjà a ghjunta di l’AOC « robba purcina ». Di regula, si divia fà per a tumbera, di ferraghju scorsu ma, per colpu di u gattivu tempu, ùn s’era pussutu fà. Cusì, un debatitu intornu à a prufessione era statu urganizatu, mostri d’animali, vedita, ecc. Un’ uchjata à i nostri antichi è u veru scopu di sta fiera.
F.P.