Hè surtitu, dopu à "Spirendu" (1999), "Canti sacri ind’a Gravona" (2003) è "Malamorti pa u so populu" (2007),"1996-2011", u quartu dischettu di Mimoria tramandata. In riassuntu di tuttu ciò ch’hè statu fattu dapoi u principiu incù trè canzone nove.
Ind’una cultura corsa chì s’avvicina, pocu à pocu, di a "varietà", si po dì, ancu s’ùn piace micca à tuttu u mondu, chè "Mimoria tramandata" tene, dapoi 15 anni, li stessa strada. "U nostru scopu, spiega Antò Tramini, capu di u gruppu, hè di mantene u militantisimi di i primi tempi di u riacquistu, ma dinò di travaglià intorna u suciale."
Una funzione suciale
Cusì, stu gruppu hà fattu a so strada. Da "Spirendu" primu dischettu (1999), à "1996-2011", l’ultimu, quindec’anni sò passati. Quindec’anni campati da i so membri è sopratuttu passati à cantà, sunà, per issi lochi (In Corsica è ancu ind’u stranieru). "Avemu sempre vulsutu fà passà un messaghju forte ind’è nostre canzone, spiega dinò Antò Tramini, stu filu s’hè mantenutu sin’à d’avale." D’a scola di cantu ch’ellu era prima, u gruppu hè crisciutu. À rombu di travaglià, d’amparà, hè divintatu, pocu à pocu, ciò ch’ellu hè oghje. "Avemu palisatu a Corsica d’oghje, ch’ella sia pulitica, culturale o ancu suciale, per via di i nostri canti." Ghjè u riassuntu di sti quindec’anni chì si trova ind’è st’ultimu dischettu. Quatordeci canti, dighjà intesi per a maiò parte. Ci si trova canzone cum’è "Sicretu di a me vita", "Timpesta", "Ch’aghju da pudè prigà", tutte di u primu dischettu ; Canti sacri "Vultum tuum" di u Nebbiu, "No nobis", "Stabat Mater di u Nebbiu" o "Vexilla Regis" (versu tradiziunale di a Gravona), di u sicondu dischettu ; "Illusioni" è "Natura persa" ghjughjenu di "Malamorti pa u so populu". In fine, u gruppu hà aghjustatu trè canzone nuvelle : "Geroztic", un cantu bascu. "Ghjè un ’allarghera d’a nostra musica incù Maitena Beheran, ch’aviamu scuntratra à u paese bascu. Incù "Baddu à Mighè Raffaelli", u gruppu hà vulsutu rende umagiu à stu maestru di a cetara.
U quintu dischettu da quì à u 2013
L’ultimu cantu "Al Aqsa" "hè dedicatu à a lotta palestiniana. A muschea d’Al Aqsa serve di solcu per spiegà a canzone." Oghje, "Mimoria tramandata" adunisce 16 membri. Antone Tramini scrive a maiò parte di e canzone è cumpone dinò e musiche. Strumenti cum’è a ghitara, a cetara, u ciarango, i cimbali, u darbuccà, u cajon o i djembè permettenu d’avè parechje culurazione musicale ch’arrichiscenu i canti. "Mimoria tramandata hè un gruppu d’amichi sinceri. A nostr’opara hè sopratuttu suciale. Per ciò chì tocca à a diffusione, pinsemu chè i cuncerti sò limitati. Oghje, circhemu e veghje. Ghjè un veru spaziu induve ci hè una leia suciale trà a ghjente." U gruppu travaglia nantu à u so prussimu dischettu incù parechje canti chì sò dighjà pronti : "In cori à mè", "u soli livanti" (umagiu à i giappunesi) "Allegria" (scrittu di Rinatu Coti), "Diana Stella" (Mario Sepulcre) o "Ciloma" (adattata d’a canzona "Tri Martolod" d’Alan Stivell). Si tuttu si passa bè, stu quintu dischettu sarà dispunivule da quì à ghjennaghju u 2013. Si sarà, di sicuru l’occasione, di vultà à nantu...
F.P.