Festivale d’autumnu di a ruralità : Una settimana trà fede, storia à cultura
Da u 3 à l’11 di nuvembre, a Conca d’Oru è u Nebbiu si mettenu in festa cù a San Martinu (13ma edizione) in lei cù u « festivale d’autumnu di a ruralità ». Cuncerti, scambii, cunferenze, scuperta di u rughjone, ecc, senza sminticà a tradiziunbale festa di i vignaghjoli sò privisti.
« Pè a San Martinu, u mostu vale vinu ». Stu pruverbiu corsu mostra bè, s’ellu ci n’hè u bisognu, chè San Martinu (4u seculu) hè u patrone di i vignaghjoli, nanzu à Vincentu, ghjuntu più tardi, è dinò di l’agricultori. Di fattu, ind’è noi, ghjè a San Martinu, una festa più antica, chì festighjata l’11 di nuvembre, intornu à u vinu. Martin. È sò avà, 13 anni, ch’in Patrimoniu, una festa adunisce l’abitanti di u rughjone è d’altrò.
Ver di una via San Martinu
Ma, à pocu à pocu, sta festa, chì stà religiosa, hà fattu nasce parechje manifestazione intornu à tematiche diverse : u cantu, a musica, a storia, l’archeologia, e fole, ecc..Cusì hè natu, l’annu scorsu, u primu festivale d’autumnu di a ruralità, natu da Christian Andreani, anzianu attore di u riacquistu, abitante di u rughjone. « U scopu hè di fà campà u mondu rurale fora di l’estate, spiega quellu, ùn si tratta mica di fà un festivale in più ma di travaglià in prufundezza, prupunendu una vera demarchja sputica intornu à parechje tematiche. Avemu u sustegnu di u cunsigliu di l’Auropa chì travaglia nantu à una via San Martinu passendu pè ottu paesi è, trà elli, a Corsica in u 2016. » U prugramma di quest’annu (durante 9 ghjorni è cù a San Martinu per compie) hè diversu ma sviluppatu in stu sensu quì Ritruvaremu cunferenze, cuncerti, musiche, lingua, gastrunumia, ma dinò archeologia, storia, fole, ecc cù parechji intarvenanti ghjunti da tutti i lochi di l’isula è ancu d’altrò. Guasgi tutte e manifestazione seranu priviste in Patrimoniu ma uni pochi in Lucciana, San Fiurenzu è ancu sin’à Bastia. Di sicuru, u fattu maiò di sti novi ghjornu serà a San Martinu, una festa religiosa, cù e so prucessiò di e cunfraternite, l’11 di nuvembre. Una festa, trà fede è…ecunumia cù a prisenza, di guasgi tutti i vignaghjoli di u rughjone (è tuttu u mondu a sà ch’elli sò belli numarosi intornu à u famosu AOC Patrimoniu). Tandu, ci serà l’occasione di tastà l’ultime buttiglie, di scambià o di cumprà. Novi ghjorni di festa cù un scopu maiò : mette in vale u spaziu rurale intornu à tuttu ciò chì face a ricchezza di a Corsica antica. Una manera d’adunesce a cultura, a storia, a religione è l’ecunumia. È, di sicuru, una manifestazione ch’un pò chè cresce d’un annu à l’altru.
F.P.