Tutti l’anni, per l’ondeci di nuvembre, a Corsica rende umaggiu à tutti quelli chì sò cascati in campu d’onore durante a prima guerra. Fattu maiò è tragicu di sta guerra, a battaglia di "Le chemin des Dames" induva sò stati tombi 135000 omi u 16 d’aprile di u 1917. Per i Corsi, sta battaglia è tutta sta guerra funu disgrazievuli...
I più ghjovani, l’anziani o dinò quelli chì cunnoscenu a storia, tutti a sanu ciò chì fù "Le chemin des Dames" è masimu ciò chì si passò stu ghjornu di veranu, u 16 d’aprile di u 1917, è u mese chì seguitò, in stu locu. "Le Chemin des Dames", stu picculu caminu fattu à a fine di u XVIIesimu seculu per permette à e figliole (chjamate "Dames de France") di Louis u XVesimu di pudè viaghjà. Un pianu (di u dipartimentu di l’Aisne) ch’era sempre statu d’un intaressu strategicu maiò, ch’ella sia à l’epica di i Rumani, di Napuliò è dinò per e duie guerre di u XXesimu seculu.
Un fiascu maiò
Stu ghjornu di u 16 d’aprile di u 1917, l’armata francese vole assaltà e pusizione di i Tedeschi piazzati nantu à a cresta. U generale Nivelle conta di mandà un numaru impurtante di suldati nantu à una ligna di 30 chilometri per tavunà u fronte di i nemichi. Cusì, vole ripiglià a so strategia vittoriosa di l’annu scorsu in Verdun. Per disgrazia, l’assaltu hè un fiascu maiò. U fretu, a neve, l’acquate, a cianga, micca lochi per piatassi, i suldati diventenu sibule faciule per i nemichi. È difese di i Tedeschi, fanu, d’altronde, chì sta battaglia hè persa da a Francia. Ancu s’è a storia dice, oghje chè i paesi alliati anu vintu sta guerra, ùn si po parlà di vittoria incù 1 300000 morti (in Francia) è a metà di struppiati, Si tratta, per a sola battaglia di "Le chemin des Dames" di guasgi 200000 morti. A Corsica pagarà dinò monda questu mumentu tragicu. Si tratta, in st’a guerra, di più di 11000 morti (secondu à i storichi) è di 12000 struppiati.
L’umaggiu di i chjami aghjalesi
A guerra di u 14 hè stata un veru scumpientu per u populu corsu. Babbi di cinque zitelli (è ancu di più), mascii di 16 anni, omi di 70 anni è certe volte, quatru generazione d’una famiglia sana, tutti sò stati arrulati à u 173esimu o 373esimu régimente d’infanteria. A maiò parte, ùn sò mai vultati in casa soia. Assai sò morti sta matina di u 16 d’aprile di u 1917 à u "Chemin des Dames". In memoria di tutti i Corsi cascati quì, i Chjami aghjalesi anu scrittu una canzona chì face scappà u pientu à tutti quelli chì a sentenu, masimu i più sensibuli. Un umaggiu forte natu da scritti di missiavi ritruvatu da certi membri di u gruppu. Una canzona surtita in u 2003 ind’è u dischettu "U mio cantu". À mezu à u "chemin des Dames", trà u rimore di e mitraglie è quelli di e bombe chì fischianu, un suldatu sunieghja à u so passatu culà in u so paese. A so amica Miola, u so ziu Francescu, u so sumere Fasgianu, a so scola induva si sentenu i zitelli, u campanile chì sona, i chjassi muntagnoli induva si sò per’si i so passi. Stu suldatu, unu di quelli ch’ùn avemu mai vistu fora di qualchi ritratti, ghjè quest’ antenatu ghjuntu da ogni paese di Corsica. È tuttu u monde, quì ricunnosce unu di i soi...
F.P.