A prima settimana di a lingua corsa principia da u 4 à u 10 di ghjugnu. L’uccasione, per Tumasgiu d’Orazio, aghjuntu incaricatu di a lingua corsa à a merria d’Aiacciu, di prisintacci sta manifestazione.
Comu hè nata a settimana di a lingua corsa ?
A CTC hà messu in piazza quest’idea, nanzu di fà, di ghjennaghju scorsu, una chjama à tutti, assoccii, culletività, imprese, scole, ecc, chì vulianu sviluppà prughjetti. A cità d’Aiacciu hà, per contu soiu, decisu di risponde. D’altronde, s’è a CTC sta u capiprughjettu, tutte l’azzione ch’avemu da ritruvà, ind’è noi, ghjunghjenu d’a merria.
Comu s’accuncierà sta manifestazione ?
Ci sò duie punti precisi :
A spressione, ch’ella sia urale, scritta o artistica. À stu nivellu quì, ci serà u dittatu à l’usu di quellu di Bernard Pivot. Si ferà sott’à a presidenza di Ghjuvan Maria Arrighi, u sgiò Ispittore d’ Academia, incaricatu di a lingua corsa postu chè no’simu in leia cù l’Educazione Naziunale. Eppò « a parolla a più longa ». S’agisse, quì, à partesi di vucale è cunsunnale, di scrive a parolla a più longa. « Demo et des lettres », un’azzione fatta, per a maiò parte, da sculari di u primariu. À partesi di 33 parolle scelte da zitelli, ci serà a pussibilità di fà, sia un scrittu, sia una produzzione graffica.
U sicondu puntu tocc’à i lochi. Vulemu chì sta settimana sia sviluppata dapertuttu, vole à dì, in tutti i lochi di a cità, per tutt’ a ghjente, pocu impreme u so età è a so situazione suciale. Cusì, tutti l’atelli saranu piazzati in centru di a cità. In fine, vulemu dinò tuccà e cucciaghje cù l’azzione « ghjurnata 100% lingua corsa ». Serà u resultatu d’un travagliu è d’una scorta di parechje settimane per quelli ch’ùn parlanu micca corsu ind’è e ciucciaghje è dinò per i parenti.
Quale sò i lochi scelti ?
Ci serà u spaziu diamante per « demo et des lettres ». Incù un’espusizione di pannelli linguistichi fatti da i sculari, ghjovani o parsone maiò di a cità. « A Parolla à più longa », « Focu à a ceppa » (quattru gruppi di musica), presentazione di libbri di scrivani. A bibbiutecca municipale per « U dittatu à l’usu Pivot » U centru suciale di San Ghjuvà per « Ghjocu quizz è cumidiula » A mediateca di a canne per fole cuntate à i zitelli da Francette Orsoni U Palazzu di i Cungressi induva ci serà, u 9 di ghjunghju, un spettaculu di fin’d’annata di i centri d’asgiu in lingua corsa.
Chì sò I scopi ricercati incù sta settimana di a lingua corsa ?
Prima vulemu mostrà u travagliu fattu durante l’annata intorn’à la lingua corsa. Ci sò, in Aiacciu, parechji atelli induva zitelli, minori o ghjovani, è parsone maiò ponu travaglià l’annu. Vulemu esse, dinò, in cuerenza cù a nostra andatura è i nostri ingaghjamenti per a lingua corsa. Ci vole i mezi perchè u bislinguisimu sia sviluppatu in Aiacciu. Sta manifestazione curresponde à u nostru scopu.
Chì ne pinsate di l’avvene di a lingua corsa ?
Ghjè un debatitu maiò ! Ci vole un’evoluzione à u nivellu ghjuridicu. Pensu chè u quadru ch’è no t’avemu avà, ùn permette micca d’avanzà veramente in u sensu d’una sucietà bislingua. Ci hà da vulè à riflete nantu à un scambiamentu di quadru chì currespundessi à i nostri bisogni. Fora di què, l’affettivu è l’aspettu puliticu si sò bulicati. Tandu, i rapporti cù a lingua è a cultura, si sò cumplicati.
Ph.P.