Nata l’annu scorsu da a vulintà di a CTC, di sviluppà una pulitica di prumuzione di a lingua è di a cultura corsa, l’operazione « Linguimondi », prupone, à mezu à una settimana carca (festa auropeana di e lingue, furu di l’associi è festa di u sportu) dui ghjorni incù partechji atelli intornu à a lingua è a cultura. Ghjè, quest’annu a cità d’Aghjacciu, in leia cù a CTC, chì accoglie sta manifestazione, sottu un tindonu, piazza Miot, i 26 è 27 di sittembre.
Si sà chè dapoi parechji anni, una certa presa di cuscenza chè ci vole salvà a lingua corsa, è per quessu, dà li mezi di pudè campà in a sucietà d’oghje, permette di sbuccà nantu à prughjetti, manifestazione o altri. Cusì, hè nata l’annu scorsu, « Linguimondi ».
Atelli, ghjochi è cunferenze
Tandu, Petru Ghionga, cunsiglieru esecutivu è Tumasgiu d’Oraziu, aghjuntu à a merria d’Aghjacciu, tutti i dui in carica di a lingua corsa, ma dinò Francesca Graziani, direttrice di u serviziu lingua corsa à a CTC è Sébastien Quenot, unu di i so aghhjunti, anu prisintatu, a settimana scorsa, in Aghjacciu, a seconda edizione di « Linguimondi ». Una manifestazione piazzata, d’altronde, à mezu à duie altre : u foru di l’associi (da u 21 à u 23 di sittembre) è a festa di u sportu (29 è 30). « Linguimondi hè l’operazione centrale di questa settimana, spiega Tumasgiu d’Orazio, ma avemu vulsutu prufità ne per aghjustà li a festa di u sportu è u foru di l’associi,induva a lingua corsa serà prisenta. Cusì, a cità d’Aghjacciu conta di mustrà a so vulintà di sviluppà u so travagliu intornu à a lingua. » Nata in 2001 in u quadru di e ghjurnate auropeane di e lingue, chì hè celebrata ogni 26 di sittembre, l’operazione si ferà intornu à parechje tematiche o atelli :A lingua, di sicuru, cù a scrittura, a cultura (puesia, cuncerti, visita di u museu Fesch è di a casa Napuliò), u teatru, i scacchi. Ma i fatti maiò di sti dui ghjorni seranu e due cunferenze « Cuntestu minuritariu d’insignamentu bislinguu è cuesione suciale » è « a lingua, un attrazzu per u sviluppu » cù invitati ghjunti da u Paese Bascu, u Paese di Gallu è di Sardegna. Ci vole à ricunnosce chè u sviluppu di l’insignamentu bislinguu in Corsica (25% di i zitelli), hà sciambuttatu u sistema educativu di l’Isula. Ma s’è u sviluppu di ste filiere da resultati, ci sò risichi, à tempu, d’una certa elitisazione chì d’altronde, ùn curresponde micca à u pianu strategicu 2007-2013, fattu, ellu, per tutti. Fendu u parangone cù l’esempiu di l’educazione bislingua in Paese Bascu, sta cunferenza permetterà, forse, di definisce i piani, à cortu andà. Fora di què, a necessità di parlà a lingua in d’altri spazii chè a scola, s’impone di più in più. À pocu à pocu, sti i spazii crescenu (linguimondi, a settimana di a lingua, ecc), è ancu s’elle mancanu sempre e strutture capace à prupone d’altre attività à i zitelli, spazii per i maiò, i primi passi sò stati fatti. Incù u sustegnu di l’eletti (tutti aduniti per salvà a lingua, ciò chì era un sonniu 20 anni fà), si po sempre sperà. Ma, incù solu, 60.000 parsone chì parlanu corsu, ci tocca à spicciassi. Sapendu, chì, à partesi di 25.000 parsone chì parlenu, si po dì d’una lingua, ch’ell’hè morta. È cusì, chì daretu à tutti sti prughjetti, a nuzione di cuufficialità di a lingua, piglia tutta a so dimensione.
F.P.
Prugramma
Marti u 25 di sittembre
9 ore è 2 ore dopu meziornu : atelli di scrittura cù Marianna Nativi.
2 ore dopu meziornu : Visita di u museu Fesch è di a casa Napuliuò
À partesi di 6 ore di sera : Scontri cù pueti di u Mediterraneu. Patriziu Croce, Ghjacumu Thiers, Antoine Ciosi (Corsica), Anna Aquilar-Amat (Catalogna), Silvan Chabaud (Uccitania), Adrian Grima (Malta).
Marcuri u 26 di sittembre
À partesi di 9 ore : Cunferenza : « Cuntestu minuritariu d’insignamentu bislinguu è cuesione suciale » cù Marlène Menozzi, Alanu di Meglio, Dominique Verdoni, Sé bastien Quenot, Vincente Climente Ferrando.
À partesi di 6 ore di sera : Culloquiu : « A lingua, un attrazzu per u sviluppu » cù a prisenza d’invitati catalani, baschi, gallesi, sardi. Ghjustra di scacchi
9 ore di sera : Pezza di teatru (U Teatrinu)