Un bilanciu pusitivu
U 24 d’aostu scorsu, specialisti di a tupunimia, scentifichi, eletti è passiuniati si sò ritruvati in Cuttuli per i primi scontri di a tupunimia. Un’idea di Ghjuvanni Biancucci, nata qualch’anni fà. Trè settimane sò passate dapoi i scontri di a tupunimia, Ghjuvanni Biancucci si rallegra d’avè adunitu, in a corti di a merria, u 24 d’aostu scorsu, più di 200 parsone. Una serata chì era a cunsequenza d’un prughjettu natu in u 2009.
Origine
« Avemu travagliatu parechji anni, spiega l’elettu è merre di u paese, a tupunimia hè testimonia di a nostra storia, tuccava à noi di astrallacci per a salvezza di stu patrimoniu oghje, in periculu. » Cù l’aiutu di l’abitanti passiunati di u paese, hà principiatu, ripigliendu, prima, e limite di a cumuna, da a muntagna sin’à u paese. Pianu pianinu, da u 2009 à u 2012, cacciadori, paisani, pastori è muntagnoli si sò aduniti ma mancava qualcosa. « Ci era un bisognu di sapè, ripiglia l’elettu, quelli chì facenu e spassighjate, ùn cunnoscenu micca i lochi. D’altronde, avemu vistu chè e carte IGN, ùn currespundianu micca à a realità di certi lochi. D’altronde, è dapoi u pianu Terrier è u cadastru di Napuliò, parechji sbaglii si sò messi unu nantu à l’altru. » Per Ghjuvanni Biancucci, a necessità di purtà e so idee davantu à l’eletti di l’assemblea di Corsica, hè divintata una primura. Una muzione hè stata posta, cù l’aiutu di u tintu Ghjuvan Carlu Martinetti ma l’affare hè stata nantu à i scagni di l’eletti di a CTC. Due anni dopu, cù u sustegnu di Petru Ghionga, quellu in nome di l’esecutivu, stu prughjettu hà fattu a so strada, sbucchendu, nantu à l’idea di sustene tutti quelli chì agiscenu nantu à u terrenu. Da u so cantu, Ghjuvanni Biancucci hà uttinutu u sustegnu necessariu d’una parte di scentifichi per pudè sviluppà u so prughjettu. « A tupunimia deve esse una primura maiò per salvà a nostra memoria culletiva di i lochi, di a storia è dinò di a lingua. L’idea era d’aduniscesi cù scentifichi per avè u materiale infurmatichi chì ci vole è, à tempu, a materia per travaglià è una banca di i nomi per lascià u fruttu di u nostru travagliu à i ghjovani di dumane. »
Un primu passu di francatu
Ci vole à ricunnosce chè i primi scontri di a tupunimia, u 24 d’aostu scorsu, anu fattu una publicità maiò à stu prughjettu. Prufessori, studienti, specialisti, scentifichi, universitarii, assuciativi, eletti, è tanti altri, travaglianu, oghje, per u mantanimentu di sta richezza maiò. Anu pussutu intarvene in Cuttuli. Trà elli, Roger Miniconi, duttore in linguistica di l’università di Corsica, Franck Leandri, cunservatore di l’archeulugia à a DRAC di Corsica, Ghjaseppina Giannesini, antrupuloga, Charles Pinelli, stututore, presidente di l’associu « les amis de l’Agriate », coscrittore d’un studiu pluridisciplinariu di u rughjone di l’Agriate, Stella Medori, maestra di cufarenza à l’università di Corsica, è tanti altri. « Un debattitu hà permessu à ognunu, di sprime u so parè, in giru à i mezi umani, technichi, finanziari necessarii à a salvezza di u patrimoniu tupunimicu di a Corsica. Ùn hè, di sicuru, ch’un primu passu. Speremu, avale, chè a CTC darà i mezi à d’altre cumune di travaglià nantu à a tupunimia. » Una vera dinamica s’hè principiata stu 24 d’aostu. Aspittemu, avè, a seguita. Ma, incù a tradizione urale chì sparisce à pocu à pocu, tuttu u mondu deve impegnassi per salvà ciò chì ferma…è custruì l’avvene senza perde ne mancu, stu caratteru sputicu, è ste traccie tramandate da i nostri antichi…
F.P.