Sò principiate l’ottu di ferraghju scorsu, e quarte dumenicate di a lingua corsa. Un insignamentu di 85 ore à u liceu Fesch d’Aiacciu, ogni venneri sera è u sabbatu sanu. Serà quessu u prugramma sin’à a fine di ghjugnu. Per sbuccà nantu à a maestria di a lingua…
Oghje, tuttu u mondu, in Corsica hè cusciente di a situazione di a lingua corsa. I respunsevuli pulitichi cercanu di sviluppà prughjetti chì vanu in u sensu di a so salvezza. Quì è cullandi, parechje azzione crescenu in l’isula. Masimu in a vita d’ogni ghjorni induva i spazii per parlà u corsu sò pochi. È cuscienti dinò chè l’insignamentu scularu ùn basta micca. Cusì, è dapoi quattr’anni, a CTC, in leia cù u Greta, hà messu in piazza « e dumenicate di a lingua corsa ». Una furmazione per tutti, impiegati, studienti, passiunati, ecc chì si passerà, quest’annu in Aiacciu è in Purti-Vechju. È chì sbuccherà nantu à u famosu certificatu di lingua corsa. Quellu hà trè nivelli (A1, A2 è B1), dunque trè gruppi di travagliu (principianti, mezani è cunfirmati). In Aiacciu, l’insignamentu si face u venneri sera (da 6 ore è mezu à 8 ore è mezu) è u sabbatu (tutta a ghjurnata).
Furmazione classica…è pratica
Ma, fora d’un aspettu classicu, e parsone feranu parechje immersione cù tematiche diverse scelte in a vita d’ogni ghjornu. Cusì, anderanu nantu à u « tarrenu » per circà à mettesi in situazione di parlà cù parsone, di sicuru, corsofone, à capu di stu prughjettu. Serà dinò l’uccasione di mette in vale ciò chì hè statu amparatu in furmazione classica. D’aprile, una surtita in muntagna hè privista. In Aiacciu, sette insignanti sò incaricati di dà una furmazione à i so « sculari ». U scopu hè di ghjunghje, dopu à 85 ore d’insignamentu à e cinque duminii di cumpetenze necessarii è dati da u quardu auropeanu di e lingue : spressione scritta, urale in cuntinuu o in iterazzione, capiscera scritta è urale. Stu prughjettu si sviluppa di più in più è cunnosce, d’altronde, dinò un successu maiò. L’idea hè principiata, in 2009 cù 20 parsone. L’annu scorsu, 63 candidati anu avutu u certificatu. Hè segnu chè a lingua corsa impegna tuttu u mondu…