Più di mille ghjucadori participeghjanu, dapoi u principiu di ghjennaghju, à u campiunatu di Corsica di scacchi. Frà elli, centu cinquanta ghjucheranu a finale, i 9 è 10 di marzu prussimu.
È ghjustre di qualificazione di u campiunatu di Corsica di u 2013 principianu sta dumenica 20 di ghjennaghju. In tuttu, ci ne serà ottu in tutti i rughjoni di l’isula : Cismonte (Grande Bastia, Centru, Balagna, Nebbiu) è Pumonte (Grande Aiacciu, Purtivecchju). Tutti sti paesi o cità (Corti, Travu, San Fiurenzu, Afà, Portivechju, Bastia, Aiacciu, Biguglia), sò incaricati d’urganizà, in leia cù a lega, una ghjustra per ghjunghje, di marzu, à a finale, in Corti. Tutti i ghjucadori, quelli chì riprisentenu l’avvene di i scacchi in Corsica, si rallegranu dighjà, ch’elli sperenu participà à u campiunatu di Francia. A sapemu chè, ogni volta, i ghjovani corsi, riescenu à ottene resultati. Ci ramintaremu, per indettu, Albert Tomasi, campione di Francia in u 2011 (principianti), terzu in u 2012 (piulelli), è a siconda piazza di Chjara Sabiani l’annu scorsu (piulelli). Tandu, principianti, piulelli, pupillii, binghjamini è minimi, tutti aspettanu, da u 20 di ghejnnaghu à u 13 di ferraghju, d’esse davanti a so scacchera cù i so pedini, cavalli, alfieri, è altre torre, dame o rè pè vince a so piazza in finale. Per ogni ghjustra (è ogni categuria), ci serà un ghjucadore qualificatu (un masciu è una femina). Sapendu, d’altronde, chè cù u numaru di licenziati (assai impurtante), a Corsica pudaria avè sin’à 60 participanti à i campiunati di Francia. Ma, ùn ci simu ancu. Per avà, mille ghjucadori sò aspittati per principià a cumpetizione. È, solu, frà elli, centu cinquanta, seranu in Corti, per a finale i 9 è 10 di marzu.
F.P.
Ghjustra una : dumenica u 20 di ghjennaghju-Centru di Corsica, Balagna (Corti)
Ghjustra dui : dumenica u 20 di ghjennaghju-Costa Serena (Travu)
Ghjustra trè : dumenica u 27 di ghjennaghju- Grande Aiacciu (Afà)
Ghjustra quattru : dumenica u 27 di ghjennaghju- Nebbiu (San Fiurenzu)
Ghjustra cinque : dumenica u trè di ferraghju- Grande Aiacciu (Aiacciu)
Ghustra sei : dumenica u trè di ferraghju-Purti Vecchju (Purti Vecchju)
Ghjustra sette : dumenica u trè di ferraghju-Bastia (casa di i scacchi)
Ghjustra ottu : dumenica u trè di ferraghju- Grande Bastia (Bastia).