I ghjucadori di Stefanu Rossi anu cacciatu u Sporting di ca cuppa di Francia, dumenica scorsa, in Timizolu. S’aspetta, avà, un altra vittima, Brest chì ghjunghjerà, per u prussimu giru in Bastia. L’occasione, per i « Neri », di francà un altru passu.
Qualchì tempi fà, pudiamu sunnià d’avè quattru squadre corse per e 32me di finale di a cuppa di Francia. U SCB è l’ACA, entravanu à stu nivellu. U Gaz, ch’avia fattu, l’annu scorsu, sunnià u populu « ross’è turchinu » avia a pussibilità di francà stu passu. È dinù u CAB. Ma si l’annu si seguitanu senza assumigliassi. Cusì, u GFCA si ne vultatu in casa nanzu l’ottesimu giru, contru à una piccula squadra di CFA2 (Saint-Louis). A sorte hà vulsutu ch’è e duie squadre bastiaccie, u SCB è u CAB ghjuchesseni una contru à l’altra. U ghjornu nanzu, dopu à un picculu giru, l’ACA era statu cacciatu da Rouen (Naziunale). S’aspittava dunque, dumenica scorsa, una certa logica trà a squadra di Liga una è quella di Naziunale. Si sà, hè vera, chè u SCB ghjè una squadra di cuppa, capace, ogni volta d’andà u più luntanu pussibule. Ma, in fattu, si pudia dumandà, dumenica scorsa, qualessa era a squadrta di L1. Cù un ghjocu lestru, mischiatu di stintu è di qualità tecniche è fisiche, i « Neri » anu datu a lezziò à i so vicini. Duie rete, in fine di primu tempu, è dopu, 45 minute à fà corre un sporting di capu ind’a conca. Bastiacci ch’ùn anu mai pussutu, à dilla franca, ghjucà, fora di Thauvin è Cahuzac, à u so nivellu. D’altonde, u SCB hà persu più ch’una partita di ballò cù u so capitanu, feritu à a spalla è Sablé chì scianchittava. Una serata à sminticà lestru, lestru per i turchini. Bastia chì pienghje…è Bastia chì ride. Quelli di u CAB anu fattu onore à i so culori è festighjatu cum’è ci vole, sta vittoria in i spugliatoghji. È si po pinsà chè l’affare, ùn hè compia ! U 22 di ghjennaghju prussimu, i ghjucadori d’Antone Emmanuelli, chì sò, per avà, à l’agrottu in campiunatu naziunale, riciveranu una altra squadra di Liga una : Brest ma sta volta in Furiani. U CAB chì riprisenterà a Corsica à l’occasione di e 16me di finale di a cuppa di Francia. È parchì micca fà cum’è u Gazelec l’annu scorsu ?
F.P.