L’offesa di Frédéric Thiriez

Ghjè una regula di a liga prufezziunale di fà vene, tutti l’anni, u presidente o unu di i soi, ind’è u tarrenu di u campione di Liga 2 per da li, à mezu à una ceremonia ufficiale, u si trufeu. Hè una manera di ricunnosce u travagliu è a qualità di a squadra ch’à vintu u campiunatu. Ma quest’annu, u sgiò presidente (Frérédéric Thiriez), ùn hà vulsutu vene in Furiani participà à sta a festa a settimana scorsa. Dicendu, à l’ultimu mumentu chè a so piazza era in Guingamp per I sò centi anni. È…torna Vignale chì ghjè un bellu paese. U sgiò presidente ci face dinò un’offese. Forse, ùn vulia micca sente zifulà i sustenitori bastiacci ma ùn hè una scusa. A so piazza, in tantu chè presidente di a Liga, era in Furiani. U fattu d’ùn vene mica mostra bè chè a noi altri corsi, ùn ci tene tantu cari. È s’è uni pochi, ùn a sapianu ancu, averanu quì, a cunfirmazione. Per i cent’anni di Bastia o di l’ACA, ùn avemu vist’à nimu. Ma, à dilla franca, u sgiò presidente s’aspetta, di sicuru, à fassi cappelli bianchi in più (o parchò micca rasassi a mustaccia !) incù u Sporting in Liga 1 è forse, u CAB. Deve pregà, avale, per chè l’ACA falessi è u Gaezelec ùn cullessi micca. Ma ci pare, quì dinò, chè t’averà, ellu è i so amichi, cum’è si dice ind’è noi « u capu ind’a conca »…