L’Aiaccini riceveranu à Montpellier, sicondu di a classifica in Liga 1, u 21 di marzu, in Timizolu per i quarti di finale di a cuppa di Francia. Vint’anni dopu, u populu "ross’è turchinu" entre dinò ind’a storia è vole sunnià d’andà, sta volta, più luntanu. Parchì micca ?
C’era, di sicuru, u mondu, davantu à a televisiò dumenica scorsa versu sei ore è mezu di sera. In Aiacciu, di u cantu di i sustenidori di u GFCOA, ma dinò dirigenti, addestradore o ghjucadori, tuttu u mondu aspittava quale avia da esse u prussimu aversariu di u Gaz in cuppa di Francia. "a prussima vittima", dicia Dumè Veilex dopu a vittoria contr’à Drancy. C’era dinò u mondu chì participava à l’emissione "Stade 2". Ma Nantu à e squadre chì firmavanu, è senza mancà di rispettu à e più "debule", a sorte, felice à l’ultimu ghjiru, hè stata un pocu dura. Hè vera chì trà Marseglia, Pariggi, Rennes, Liò è Montpellier, quattru di e furmazione e più forte di u mumentu, paria abbastanza difficiule di sfrancassine una. Fora di Valenciennes, Marseglia, Pariggi è Liò, u Gazelec ùn avia mai ghjucatu contr’à Rennes è Montpellier in cuppa di Francia. È u destinu hà vulsutu ch’ella sia a squadra di Loulou Nicollin chì sbarchessi in Aiacciu u 21 di marzu chì vene. S’è no femu un parangone cù u 1992, quandu i "rossi è turchini" eranu andati sin’à i quarti di finale di a cumpetizione, si vede chè u gaz avia vintu, nanzu, duie squadre di prima divizione (Toulò è Saint-Etienne), una quest’annu (Toulouse) è una altra di liga 2 (Troyes) ma, sta volte, l’Aiaccini ghjochenu in Naziunale invece ch’in u 92, eranu in siconda divizione, è masimu, cù u statutu prufessiunale. À l’epica, u GFCA ghjucava contr’à Monaco, sicondu di a classifica è in finale di a cuppa d’Auropa (C2). Una squadra di talente incù Djorkaeff, Petit, Thuram, Weah, Rui Barros, Passi o Sivebaek. Sta volta, t’averà in faccia à ella, una generazione di ghjovani -a maiò parte sortenu di u centru di furmazione- è sopratuttu, una granda forza culletiva. U gazelec t’hà e so qualità ma hè impegnatu in u campiunatu Naziunale induva po sperà, incù a so terza piazza di a classifica, cullà in liga 2. Sapemu, d’altronde, chè a squadra aiaccina, ùn hà tanti ghjucadori in u so effetivu (una vintena à pocu pressu).Po, dunque lascià abbastanza forze in a battaglia. Parchì a cuppa di Francia è u so cuntestu particulare face spende energia. Ma sapemu dinò, quant’hè bella sta storia trà a signora cuppa è u Gaz. È quì, ùn ci bisognu à calculà. Cusì, vint’anni dopu à a generazione di Jean-Marie Ferri, José Pastinelli o Céar Nativi, quella di Louis Poggi, Johan Bocongnano o Antò Colinet sunnieghja di francà stu passu. Privu di a so "pignatta" di Mezavia (regulamete di a FFF), u Gaz ghjucherà in Timizolu induva ci hè di più spaziu è menu pressione di u publicu (ciò ch’ùn prufitta micca à l’aiaccini). Ma ci serà, di sicuru, un mondu scemu per vene à sustene i "rossi è turchinu". È cum’ellu dicia u Presidente Fanfan Tagliaglioli, "incù u gaz, tuttu hè pussivule !"
F.P.