Face guasgi trè settimane chì Jean-Michel Cavalli hè divintatu l’addestratore di u GFCA. Dopu à a decisione abbastanza sviluppata in a stampa, di spiccassi di Dumè Veilex, I dirigenti volenu, dinò, fà u puntu.
« Ùn si pudia micca cuntinuà cusì ». Cù‘sse parole, Olivier Miniconi, presidente delegatu di u gazelec, spiega, a decisione, trè settimane fà, di scambià d’addestratore è di spicassi di Dumè Veilex. Una decisione chì, ci vole à dilla, hè stata male accolta da i sustenitori « ross’è turchinu » è dinò, in a cità imperiale. « Pudemu capisce a scuntentezza di a ghjente, ripliglia Olivier Miniconi, ma, aviamu fattu u puntu di a nostra situazione spurtiva. L’ambiente, ind’a squadra tecnica è u gruppu, ùn era micca tremende. D’altronde, ùn c’eranu più e cundizione per sbuccà ànnantu à i nostri scopi spurtivi. Ci era troppu pressione, forse, per ellu, di stu nivellu. Tandu, avemu pigliatu sta decisione, per l’intaressu di u GFCA. » Purtantu, l’addestratore avia riesciutu u scopu di fà cullà, in dui anni, u gaz, da u CFA à u mondu prufessionale. « Iè, ùn cacciemu micca ciò ch’ellu hà purtatu à a u gaz, ma, sti successi, ùn sò micca u fattu d’una parsona sola. S’è u GFCA hè quì, oghje, ghjè a riesciuta di tuttu u mondu : ghjucadori, squadra tecnica, dirigenti, sustenitori, benevuli, ecc. » Per rimpiazzà à Dumè Veilex, i dirigenti anu travagliatu nantu à trè punti precisi : A cunniscenza di u nivellu, u cuntestu particulare di u ghjocu à ballò corsu, di u GFCA, è u gruppu. « Per noi, Jean-Michel Cavalli, era quellu chì s’avvicinava u più. Ma, era sempre in cuntatu cù d’altre squadre. Finalmente, hà dicisu di vene quì. Hè un bè ; cunnosce sti culori, hè l’omu di a situazione. » Hè vera, incù guasgi vint’anni passati quì, chè Jean-Michel Cavalli cunnosce sta squadra ma dinò u nivellu di a Liga 2. Nim’ùn s’hè scurdatu di u « miraculu » fattu cù Nîmes, trè anni fà (salvatu à l’ultima ghjurnata dopu avè pigliatu 31 punti in 6 mesi). Per avà, l’addestratore aiaccinu, hà riesciutu a so entrata à un nivellu ch’ellu cunnosce abbastanza bè. Aspittemu, avà, a seguita di u campiunatu…
F.P.