S’elli ci eranu 10000 parsone in Timizolu, dumenica scorsa, quelli chì sò stati in casa anu avutu, cù d’altri corsi (o sustenitori d’altrò) di vede a partita –chjamata da certi u « Corsico »- nantu à beIN Sport 1 è sopratuttu 2 cù cumenti in lingua nustrale di Petru Leca, Ghjuvan Michele Cavalli è Pasquale Olmeta. Qualcosa d’esceziunale per u corsu…
« U 21 uttobre, BeIN Sport diffusarà in diretta u "derby" AC Ajacciu/SC Bastia. Per e duie squadre chì sò à un puntu una da l’altra à a classifica, ghjè una partita impurtante. U scontru serà diffusatu da beIN Sport cù i cumenti di Petru Leca, Ghuvan Micheli Cavalli è Pasquale Olmeta in corsu nantu à beIN SPORT 2 è da Philippe Genin, Bruno Cheyrou è Pierre-Yves André nantu à beIN SPORT 1 (in francese). » Ùn hè micca un sognu. Stu « mail » in lingua nustrale hè statu mandatu una settimana nanzu a partita Aiacciu-Bastia, in Timizolu, à uni pochi di ghjurnalisti corsi, per prisintà un cumentu particulare da beIn Sport. Prima, era bellu difficiule di pinsà chè, nantu à a TV naziunale, si pudia avè un scontru in lingua corsa. Ma l’anu fattu ! Stu 21 d’uttobre, nantu à beIN 2, Petru Leca, cù l’aiutu (di sicuru spurtivu) di Ghjuvan Michel Cavalli, addestratore di u Gazelec è Pasquale Olmeta, anziani purtieru di Bastia, hà assicuratu i cumenti di u « derby » in lingua nustrale. Serà, di sicuru, a prima volta chè u corsu hè statu « invitatu » nantu à a televisiò naziunale (è ancu internaziunale). Novanta minute in lingua nustrale, l’emuzione, u stintu, a passione, tuttu era adunitu per permette à i Corsi chì stanu luntanu (in cuntinente è ancu ind’u stranieru) di vede stu scontru ma nanzu di tuttu, di sente lu in lingua corsa. Si pò pinsà chè, cù stu genaru di manifestazione, beIN conta marcà assai punti. Stu ghjorni quì, è fora di cumenti in corsu (Petru Leca era statu chjamatu da respunsevuli di beIN), avianu invitatu i ghjurnalisti isulani per ch’elli pudessini scuntrà quelli di a tv, scambià cùn elli, fighjulà comu si passa a diffusione d’una partita. Hè, di sicuru, un’altra manera, più muderna, di cuncepisce u ghjurnalisimu è d’adunisce l’inseme di a prufessionne. In tutti i casi, un passu di più, per noi altri corsi, ver di a ricunniscenza di a nostra lingua. È, ùn ci lagnaremu micca…
F.P.
