In memoria
Stu sabbatu quatru d’aostu, l’ACA riceve, per a prima volta, una squadra taliana in u quadru di a ghjustra in ricordu di Michele Moretti, u so presidente sparitu di marzu u 2008. L’occasione, per l’Aiaccini, di fà un ultimu puntu, una settimana nanzu à u principiu di a Liga una.
Tutti l’anni, guasgi à li stess’epica, è dapoi quattru anni, i dirigenti di l’ACA urganiseghjanu una ghjustra, in ricordu di u so tintu presidente. Cusì, e duie prime annate, una partita s’hè ghjucata à a fine di lugliu. Una vittoria di Marseglia per a prima edizione (2008) è una bella vittoria, un annu dopu per l’ACA, in finale (contr’à Bastia) d’una ghjustra chì, per a prima volta, cuntava quattru squadre corse (ACA, SCB, GFCOA è Calvi). L’occasione di fà, di stu mumentu, un umaggiu à l’anzianu presidente di l’ACA senza sminticà un importante intaressu spurtivu. Ma dapoi u 2010, sta partita s’hè ghjucata di sittembre, quand’u campiunatu di L1 è L2, lasciava a so piazza à a squadra di Francia. Ùn ci era, forse, micca u tempu di ghjucà nanzu.
Ver di una ghjustra di u Tarraniu ?
Quest’annu, incù u campiunatu d’Auropa, a cumpetizione di Liga una, ùn principia chè l’ondeci d’aostu. Cusì, una settimana nanzu, è dopu à a perioda d’appruntera di a staghjone, sta ghjustra, u quattru d’aostu, casca bè. Hà da, di sicuru, permette à Alex Dupont, l’addestratore aiaccinu, di fà un ultimu puntu nantu à u so gruppu (nivellu individuale è culletivu). Ghjè dinò, per i sustenidori, u mumentu di vede, nantu à u tarrenu, a squadra di quest’annu, è masimu, i nuvelli ghjucadori (Diarra, Deville, Belghazouani, Faty). Hè vera, ch’è l’Aiaccini anu ghjucatu tutte e so partite fora di casa. I resultati lascianu quantuque sperà (fora di una disfatta contr’à Bastia 2-1, l’Aiaccini anu battutu à Bordeaux 2-1 è tinutu a parità contr’à Toulouse 0-0).
Ma quest’annu, per a ghjustra Michele Moretti, sarà a prima volta, ch’una squadra taliana hè invitata. U Cagliari, squadra di u Calcio, 16mu di l’ultimu campiunatu. Un campiunatu, forse, unu di i più forti d’Auropa. E una squadra cù ghjucadori famosi cum’è Daniele Conti (u fighjolu di Bruno Conti, chì conta 345 scontri sottu à a maglietta di u Cagliari), Ekda, Pinilla o Astori. Fora di u so cuntestu spurtivu è di l’umaggiu à Michele Moretti, stu genaru di partita trà squadre di rughjoni assai vicini (nantu à parechji nivelli) hè un’idea bona. E parchì micca, à long’andà, una vera ghjustra cù squadre di u Mediterraneu (Sardegna, Sicilia, Grecia, Malta, etc…). Sicura ch’ella custaria assai ma saria più in leia cù ciò ch’ellu vulia u tintu presidente è l’andatura ch’ellu cerca, d’una manera generale, u ghjocu à ballò corsu è sopratutti e squadre professiunale cum’è l’ACA. Ci hè da rifletta…
F.P.