Incù a squadra corsa, avemu l’abitudine d’avè un scontru à l’annu. Cusì, stu 24 di maghju, i Corsi ghjucheranu una partita contr’à una selezzione di ghjucadori auropeani. Una partita particulare postu chì, sta volta, i respunsevuli anu vulsutu rende umaggiu à e vittime di a disgrazia di Furiani.
Un annu dopu à a so bella vittoria contr’à a Bulgaria, a squadra corsa ripiglia u serviziu. Ma, s’appronta, quest’annu, un scontru particulare. « Era logicu, per i vint’anni di a disgrazia di Furiani, di rende, noi dinò, un umaggiu, spiega Andria Di Scala, unu di i respunsevuli. U fattu hè ch’ùn si pudia participà à ste celebrazione à tempu à l’altri chì tuttu u mondu er’ impegnatu ind’i so campiunati a dumenicata di u 5 di maghju scorsu. D’altronde, incù u campiunatu d’Auropa chì principierà di ghjunghju, i respunsevuli avianu pocu tempu per appruntà qualcosa. « Una settimana à u più, ripiglia Andria Di Scala, trà a fine di i campiunati è u principiu di l’Euro. » Finalmente, hè stata decisa a data di u 24 di maghju in…Aiacciu. Prima, sta partita si devia ghjucà (era logicu) in Furiani ma “I respunsevuli di a CAB, ci anu dettu, à l’ultimu mumentu ch’ùn si pudia fà. Tandu, ghjucaremu in Aiacciu. » A squadra ricivuta ? « Una selezzione di ghjucadori di ballò ghjunti da parechji lochi. U ghjuc’à ballò auropea nu in tutti a so diversità. Era quessu l’umaggiu ch’è noi vuliamu rende.” Gjhè, quantunque una bella squadra chì scuntrerà i nostri ghjucadori corsi : Owen (Manchester United), Gallagher (Liverpool), Heskey (Aston Villa), Essien (Chelsea) è dinò d’altri cum’è Costil (Rennes), Camara (PSG), Sauget (Sochaux), ecc… Tutti seranu addestrati da Gérard Houiller. Da u cantu di i Corsi, ci serà poca surpresa incù a maiò parte di quelli chì facenu onore dapoi dighjà qualch’anni. S’aspetta, quest’annu, Alessandri, u ghjucadore di Clermont. D’altronde, sta partita, pudaria compie a staghjone magnifica di u ghjoc’à ballò isulanu. « Riprisenta qualcosa di maravigliosu. Ind’un’ isula di 300000 parsone, ciò ch’elli anu fattu e nostre squadre, ch’ella sia Bastia,campione di Liga 2, l’ACA chì si po mantene in Liga 1, u GFCOA, chì speramu, cullerà in L2 o u CAB mostra bè ch`u travagliu porta i so frutti, masimu senza troppu mezi. » Ùn ci vole micca scurdassi chì dapoi a so prima partita contr’à u Congo, di maghju u 2009, a squadra corsa hà permessu à parechji di nostri ghjucadori (Cavalli, Cioni, Lippini, Tiberi…) di pudè ghjucà ind’è elli. Aspettemu dunque, incù passione, st’appuntamentu incù u ghjoc’à ballò auropeanu…
F.P.