Storicu di a stampa corsa à u liceu Fesch (parte una)
Hè compia a 23ma edizione di a settimana di a stampa à a scola. Ci vole à sapè, chè tutti l’anni, i sculari corsi, riescenu à fà ghjurnali è ponu esce qualchì numari durante l’annata, certe volte, un mesincu. In a Francia sana, ci ne saria, trè mille ogni annu. Cusì, dapoi u 1926, 45 000 ghjurnali sculari sò esciuti. Ind’è noi, i sculari participeghjanu à stu mumetu impurtante ch’ella sia a stampa scritta, audiu o a radiufonica. U JDC face u puntu cù Petru d’Orazio, prufessore à u Liceu Fesch in Aghjacciu. Un stabulimente induva sò passati uni pochi di ghjurnalisti corsi...
Chì pinsate di a settimana di a stampa à a scola ?
Quest’annu, ghjera a 23ma edizione. Cum’è tutti l’anni, si vede chè i sculari corsi danu un intaressu maiò à sta manifestazione. Masimu per a stampa scritta. D’altronde, u ghjurnalistu Pasquale Bontempi avia prisintatu in i so tempi (3 d’aprile di u 1991, "La Corse") sti ghurnalisti cum’è « scrittori di sti foglii effimeri entrati, ind’a prufessione ghjurnalistica". È sapia ciò ch’ellu dicia, postu ch’ellu avia cunnisciutu u liceu Fesch in tantu chè scularu. Avia participatu à scritti cum’è "Les pieds dans le plat", "Les enfants terribles", "L’oeuf". Pasquale Bontempi dicia chì st’epica, per u scularu, era una perioda induva ellu vulia sprimà ciò ch’ellu t’avia nentru à ellu ; rivolte, puesia, ghjurnale parsunale, ciò ch’ellu risintia o campava ind’a so vita d’ogni ghjornu.
Issa manifesazione, puderia fà nasce qualchì vucazione ?
Pierre-César Romei, ellu dinò anzianu liceanu di u Fesch, divintatu ghjurnalistu, s’hè ramintatu di l’intaressu ch’elli purtavanu i sculari di stu liceu à u mistieru di ghurnalistu. Ind’un articulu (Archivi di u ghjurnale sculare « Fesch »), ci serà una reflessione nantu à certi numari testiminii di a so epica : « Du Marquis, organe des collégiens » ( 1910) à « L’oeuf » (1962) ma dinò « La Langouste qui siffle » (1924), « Le Bahutien » è ancu « La Gazette normalienne » (1927), « La voix potache » (1933), « Le potache, hebdo des jeunes » (1937) senza sminticà « Lingua Corsa » (1960). D’altronde, Paulu Silvani, ci hà cuntatu, di farraghju scorsu, in un’emissione radifunica chjamata « Memorie isulane » u so passaghju in a stampa sculara nanzu di principià u so mistieru di ghjurnalistu.
Pinsate chè pò ghjuvà di mette a stampa in leia cù a ghjuventù ?
Pensu chè i média sò a basa di a demucrazia. Hè per quessu chè i nostri ghjovani devenu esse in cuntattu strettu cù l’infurmazione. Ghjè un eserciziu necessariu per l’ampareradi i so diritti è di i so duveri.